भारतीय प्रधानन्यायाधीश रञ्जन गोगोइविरूद्ध यौन दुराचारको आरोप लगाउने महिलाले यस विषयमा गरिएको आन्तरिक छानविन समितिमा जान इन्कार गरेकी छन्।
सर्वोच्च अदालतका न्यायाधीश एस ए बोबडेको अध्यक्षतामा गठित तीन सदस्यीय समितिको सुनुवाई प्रकृयामा तीनदिनसम्म भाग लिएकी ती महिलाले बुधवार प्रेस विज्ञप्ति जारी गर्दै आफू अब जान नसक्ने बताएकी हुन्।
अझै बढी पिडित हुने डर देखेकाले समितिले गरिरहेको सुनुवाई प्रकृयामा आउन नसक्ने बताएकी हुन्। उनले प्रेस विज्ञप्ति जारी गर्दै आफूलाई छानविन समितिले संवेदनशील भएर व्यवहार नगरेको पनि बताएकी छन्। छानविन समितिले आफ्नी वकीललाई वयानमा उपस्थित हुन नदिएको, भिडियो र अडियो रेकर्ड विनै बयान लिएको उनले बताएकी छन्। सुनुवाईबाट फर्किदाँ दुईचारजना शंकास्पद व्यक्तिले पिछा गरेको उनले बताइन्।
समितिमा सर्वोच्च अदालतका दुई महिला न्यायाधीश इन्दु मल्होत्रा र इन्दिर बनर्जी पनि छन्।
सर्वोच्च अदालतकै पूर्व कर्मचारी रहेकी ३५ वर्षीया ती महिलाले अघिल्लो शनिबार केही सञ्चारमाध्यामलाई प्रधानन्यायाधीश गोगोइले आफूमाथि यौन दुर्व्यवहार गरेको र आफ्ना श्रीमानलाई समेत दुख दिएको बताएकी थिइन्। गोगोइले उनको आरोपलाई खण्डन गर्दै स्वतन्त्र न्यायपालिकामाथि आक्रमण भएको बताएका थिए।
त्यसपछि सर्वोच्चका बरिष्ठतम न्यायाधीश बोबडेको नेतृत्वमा छानविन समिति गठन भएको थियो।
