उत्तर कोरियाका शासक किम जोन उनका सौतेनी दाइलाई मारेको अभियोगमा दुई वर्षदेखि मलेसियाको जेलमा रहेकी एक भियतनामी महिलालाई जेलमुक्त गरिएको छ।
डोआन थि होङ नाम गरेकी ३० वर्षीया ती महिलाका वकिलले शुक्रबार उनी जेल मुक्त भएको जानकारी दिएका छन्।
२०१७ मा इन्डोनेसियन महिलासँग मिलेर उत्तर कोरियाली शासक उनका सौतेनी दाइ किम जोङ नामलाई क्वालालम्पुरको एयरपोर्टमा भिएक्स नामक प्रतिबन्धित रसायन दलेर मारेको आरोप लगाइएको थियो।
उक्त विषादीले असर गर्न थालेपछि उपचारका लागि अस्पताल लैजाँदा लैजाँदै बाटोमै नामको मृत्यु भएको थियो।
होङसँगै नामको हत्यामा आरोपित इन्डोनेसियन महिला सिति आइसालाई भने गएको मार्चमै जेलमुक्त गरिएको थियो। उनको मुद्दा पनि सरकारी वकिलले फिर्ता लिएका थिए।
होङले नामसँग प्रयांक गर्नमात्रै कोशिस गरेको जिकिर गरेपछि मलेसियाका सरकारी वकिलले उनीविरूद्ध लगाइएको कर्तव्य ज्यानसम्बन्धी उजुरी फिर्ता लिएका हुन्। आफूहरूले टिभी कार्यक्रमका लागि प्र्यांक गरेको दुवै महिलाले बताएका थिए। आफूले प्रयोग गरेको रसायनमा विष भएको कुरा आफूलाई थाहा नभएको उनीहरूले बताउँदै आएका थिए। किमको हत्या नगरेको पटक/पटक बयान पटक/पटक दिएपछि सरकारी वकिलले उनीहरूलाई नामको हत्या अभियोगबाट मुक्त गरिदिएको हो।
होङ शुक्रबार आफ्नो देश भियतनाम फर्किने उनका वकिल हिस्याम तेहले बताएको रोयटर्सले जनाएको छ। उनलाई जेल मुक्त गरेलगत्तै विमानस्थलको अध्यागमनको हिरासतमा राखिएको छ। उनलाई भियतनामको राजधानी हानोइ पठाउनुअघि त्यहाँ राखिने बताइएको छ।
दक्षिण कोरिया र अमेरिकाले आफ्नो देशको वंशवादी कानुनको आलोचना गरेका कारण उत्तर कोरियाको सत्ताले नै नामको हत्या गर्न आदेश दिएको आरोप लगाएका थिए। तर उत्तरकोरियाले भने यो आरोपलाई इन्कार गरेको थियो।