खाडी मुलुक कतारले पहिलो पटक भूमिगत रेल सेवा सुरू गरेको छ।
बुधबार राजधानी दोहादेखि दक्षिणी सहर अल-वाक्राहको रेड रूटमा मेट्रो रेल सेवा सुरू भएको हो। ४० किलोमिटर लामो यो रूटका १८ मध्ये १३ स्टेशनमा रेल चल्न थालेको छ।
सन् २०२० सम्म सक्ने गरी कतारले पहिलो चरणमा थप दुई (ग्रिन र गोल्ड) रूट पनि बनाइरहेको छ भने दोस्रो चरणको ब्लु लाइन सन् २०२६ मा सक्ने लक्ष्य छ। दोहा मेट्रोका लागि ३६ अर्ब अमेरिकी डलर खर्च लाग्ने अनुमान छ।
‘यो कतारको एक वृहत परियोजना हो। यो सञ्चालनमा आएको नयाँ परियोजनामात्र होइन देशको यातायातको नयाँ तरिका पनि हो,’ कतार रेलका जनसम्पर्क तथा सञ्चार निर्देशक अब्दुल्ला अल मालवीले अलजजिरासँग भने।
जापानमा बनाइएका मेट्रो रेलमा प्रतिघन्टा ८० देखि सय किलोमिटरका गतिमा गुड्छन्। एउटा स्टेशनमा ६ मिनेट अन्तरमा रेल आइपुग्ने र अर्को स्टेशन पुग्न तीन मिनेट लाग्ने बताइएको छ।
मेट्रोभित्र स्टाण्डर्ड, फ्यामिली र गोल्ड क्लब गरी तीन प्रकारका सिट छन्। एउटा रेलमा ४१६ जनाले यात्रा गर्न सक्छन्।
मेट्रो रेल बिहान ८ देखि राति ११ बजेसम्म सञ्चालन हुन्छ। सप्ताहन्त भने अपग्रेडको काम गर्नु पर्ने भएकाले मेट्रो बन्द हुने बताइएको छ।
मेट्रो सुरू हुने भएपछि बुधबार रेलवे स्टेशनमा मानिसहरूको भीडभाड भएको थियो।
यो मेट्रोको निर्माण सन् २०१३ मा सुरू भएको हो। सन् २०२२ को फिफा विश्वकप आयोजना गर्ने कतारले त्यसका लागि व्यापक पूर्वाधार बनाइरहेको छ। अहिले मेट्रोले जोडिएको दक्षिणी सहर अल-वाक्राहमा विश्वकपका लागि मैदान बनिरहेको छ।
