न्यायाधीश सिफारिश गर्ने संवैधानिक निकाय न्यायपरिषद सदस्य र वकिलहरूको छाता संगठन नेपाल बार एशोसिएशनका अध्यक्ष सार्वजनिक ठाउँमा झगडामा उत्रिएका छन्।
कानुन दिवसको अवसरमा सर्वोच्च अदालतले आयोजना गरेको चियापान कार्यक्रममा न्यायपरिषद सदस्य रामप्रसाद सिटौला र नेपाल बार एशोसिएसनकाअध्यक्ष चण्डेश्वर श्रेष्ठले तँतँ र मम भन्दै झगडा गरे।
बिहीबार दिउँसो सर्वोच्च परिसरमा भएको चियापान सकिएपछि कार्यक्रमस्थलबाट निस्किनै लाग्दा दुबैको जम्काभेट भयो।
सुरूमा न्यायपरिषद सदस्य सिटौलाले बार अध्यक्षलाई सोधे - तपाईंले के पत्र लेख्या मलाई?
वैशाख ९ गतेको बैठकले परिषद सदस्य सिटौलालाई एउटा पत्र लेख्ने निर्णय गरेको थियो। त्यही निर्णयअनुरूप उनलाई बारले चिठी पठाएको थियो।
पछिल्ला न्यायाधीश नियुक्ति विवादित भएपछि नेपालबारले चासो राख्दै परिषद सदस्य सिटौलालाई चिठी लेखेको हो।
न्यायाधीश नियुक्ति सिफारिस सरूवाबढुवा र कारबाही गर्ने संवैधानिक निकाय हो न्यायपरिषद। प्रधानन्यायाधीश अध्यक्ष रहने ५ सदस्यीय उक्त परिषदमा बारले पठाएका एकजना सदस्य हुन्छन्। बारको सिफारिसमा सिटौलालाई संसदीय सुनुवाइ समितिले अनुमोदन गरेर परिषदमा पठाइएको हो।
उनीसहितको परिषदले चैत १९ गते सर्वोच्चमा पाँच र उच्च अदालतमा १८ न्यायाधीश नियुक्ति गरेको थियो। अनुभव योग्यता र बरिष्ठता समेतका आधारभूत मापदण्ड नहेरी आफन्त, इष्टमित्र र दलगत भागबण्डामा न्यायाधीश सिफारिस गरेको भन्दै परिषदको आलोचना भएको थियो।
उक्त आलोचनापछि बारले पनि धारणा दिनुपर्ने दबाब थियो। बारले परिषदमा आफ्ना प्रतिनिधि भएर गएका सिटौलासँग परामर्श गर्ने र आउँदा न्यायाधीश नियुक्ति विवादित नबनाउन के गर्न सकिन्छ भन्ने छलफलमा उपस्थित हुन बोलाएको थियो।
त्यही चिठीबारे सिटौलाले बार अध्यक्ष श्रेष्ठलाई प्रश्न गरेका हुन्। उनलाई प्रतिप्रश्न गर्दै श्रेष्ठले सोधे- के कुरा गर्नुभएको तपाईंले? तपाईं बारले न्यायपरिषदमा पठाएको व्यक्ति होइन?
सिटौलाले फेरि भने, ‘तपाईं को हो मलाई यस्तो भन्ने बारसँग मेरो टुटिसक्यो।’
त्यसपछि उनीहरूबीच तँतँ र मम सुरू भयो।
‘तँलाई म देखाइदिन्छु ,’ श्रेष्ठ सिटौला सामुन्ने गएर मुखामुख गर्दै भने।
‘तैंले के गर्न सक्छस् गर म पनि देखाइदिन्छु,’ उनले चोरऔंला देखाउँदै भने।
उनीहरूबीच झण्डै हातहालाहालको स्थिति बन्यो।
‘हामी पनि अभियन्ता (एक्टिभिष्ट) हौं हामीले देखाइदिन सक्छौं,’ बार अध्यक्ष श्रेष्ठले जवाफ दिए।
यतिञ्जेल त्यहाँ भेला भएकाहरूले उनीहरूलाई छुट्ट्याए। मानिसहरू झुम्मिन थालेपछि पनि उनीहरू तँतँ र मम गर्दै बाझिरहेका थिए।
त्यसपछि सिटौलाको गाडी आइपुग्यो, उनी निस्किए। श्रेष्ठ भने जम्मा भएका मानिससँग कुरा गर्दै एकैछिन उभिए।
एकछिनमा भीड तितरबितर भयो।