विद्यालय, अदालत र मिडिया तीनै क्षेत्रमा नेपाली भाषामा एकरूपता ल्याइने भएको छ।
नेपाली भाषाको प्रयोगमा विविधता आएको भन्दै नेपाल प्रज्ञा–प्रतिष्ठानबाट प्रकाशित दशौं संस्करण ‘नेपाली बृहत् शब्दकोश’अनुसार सबै क्षेत्रमा भाषामा एकरूपता ल्याउन लागिएको हो।
भाषामा एकरूपता ल्याउने विषयमा प्रतिष्ठानले सबै क्षेत्रमा गोष्ठी तथा छलफल अघि बढाइरहेको प्रतिष्ठानका सदस्य सचिव जगत्प्रसाद उपाध्यायले बताए।
‘राष्ट्रिय परीक्षा बोर्डले पनि आफ्ना मातहतका सबै तहमा परिपत्र पठाइसकेको छ’, उनले भने।
नयाँ प्रकाशन हुने नेपाली पाठ्यपुस्तक शब्दकोशको वर्णविन्यासानुसार तयार गरिने बताइएको छ।
उनी थप्छन्, ‘नेपाली विषय पढाइ हुने सबै निजी र सरकारी विद्यालयका पाठ्यपुस्तकमा नेपाली भाषामा एकरूपता ल्याइन्छ।’
शैक्षिक क्षेत्रमा एकरूपता ल्याउन शिक्षा मन्त्रालयले परिपत्र जारी गरिसकेको छ।
