अष्ट्रेलियाको सिड्नीमा आइतबारदेखि चालकबिनाको मेट्रो रेल सञ्चालनमा आएको छ।
सिड्नीको मेट्रो नर्थ वेस्ट लाइनको राउज हिलदेखि च्याट्सवुडसम्मको ३६ किलोमिटर लामो भूमिगत लाइनमा आइतबार बिहानदेखि चालकबिनाका रेल चलेका हुन्। उद्घाटन भएकाले आज सबै यात्रुलाई नि:शुल्क रेल चढ्न दिइएको थियो। पहिलो पटक चालकबिनाको रेल चढ्न पाउने भएपछि स्टेशनमा सिड्नीवासीको भीड लागेको थियो।
पाँच वर्षअघि निर्माण सुरू गरिएको मेट्रो लाइन बनाउन सात अर्ब अमेरिकी डलर खर्च भएको छ। अहिले १३ वटा स्टेशनमा मेट्रो कुद्न थालेको छ। पिक आवरमा प्रत्येक ४ मिनेटमा स्टेशनमा रेल आइपुग्ने गरी व्यवस्था गरिएको जनाइएको छ। आवश्यक मर्मतसम्भार गर्नका लागि राति ९ बजेपछि रेल बन्द हुने छ।
प्लेटफर्ममा मेट्रो रोकिएपछि आफैं खुल्ने शिशाका ढोकाहरू जडान गरिएको छ।
यो मेट्रो चलाउन अष्ट्रेलियाले स्वदेशी प्रविधिको प्रयोग गरेको छ। सन् २०२४ सम्ममा सिड्नीभरि ६६ किलोमिटरमा यस्ता चालकविहीन मेट्रो चलाउने गरी काम भइरहेको छ।
