गृहमन्त्री रामबहादुर थापा ‘बादल’ले सातै प्रदेशमा बाहिनीपतिको रूपमा सरुवा भएका सशस्त्र प्रहरी बलका प्रहरी नायब महानिरीक्षक (डिआइजी)हरूलाई छलफलका लागि गृहमन्त्रालयमा डाकेका छन्।
बुधबार गृहमन्त्रालयमा बोलाएर उनले डिआइजीहरूलाई परिणाम देखिने गरी काम गर्न निर्देशन दिए।
‘राष्ट्र सेवकको मूल्यांकन उसले दिने परिणामबाट मात्र हुन्छ, त्यही भएर परिणाम निक्लने गरी काम गर्नुहोस्,’ उनले भने।
उनले एपीएफलाई राज्यले दिएको जिम्मेवारी अनुरूप सीमामा हुने तस्करी,राजस्व चुहावटमा विशेष ध्यान दिइ सचेत रहन सुझाए।
‘शान्ति सुरक्षा, सीमा सुरक्षा, विपद् व्यवस्थापनका साथै सीमामा हुने तस्करी,राजस्व चुहावटमा विशेष ध्यान दिनुहोस्’,उनले भने, ‘प्रदेशको विशिष्टता अनुसार एक्सन प्लान बनाउनुहोस् र जनतासँगको सम्बन्ध सुमधुर राख्दै काम गर्नुहोस्।’
सो क्रममा गृहसचिव प्रेमकुमार राईले गृहप्रशासन सुधार कार्ययोजना, मन्त्रालयको नीति नियम, निर्देशन, संगठनको कार्ययोजना अनुरूप काम गर्न निर्देशन दिए।
मनसुन सुरू हुन लागेकोले कार्यक्षेत्रमा जानासाथ आफ्नो प्रदेशको विपद् व्यवस्थापनको लागि आवश्यक योजना बनाउन उनले निर्देशन दिए।