धादिङमा सवारी दुर्घटनामा परी एक जनाको ज्यान गएको छ।
धादिङबेसीबाट सेमजोङ जाँदै गरेको बा १ ज ६०२१ नम्वरको बोलेरो जिप स्याउली पाङ्ग्रो खोलामा उकालो चढ्ने क्रममा दुर्घटना निम्तिएको हो।
उकालोमा जिप चढ्न नसकेपछि केही यात्रुहरु आत्तिएर हाम फालेका थिए। सोही क्रममा जिपले किचेर नीलकण्ठ नगरपालिका–३ सिम्लेगैरीका ३८ वर्षीय शेरवहादुर लामाको मृत्यु भएको जिल्ला प्रहरी कार्यालय धादिङले जनाएको छ।
घाइते चार जनालाई जिल्ला अस्पताल धादिङमा प्राथमिक उपचारपछि काठमाडौं पठाइएको छ। जिपमा १५ जना यात्रु सवार रहेको बताइएको छ। अरु यात्रुको अवस्था सामान्य रहेको प्रहरीले जनाएको छ। दुर्घटनामा परेर घाइते हुनेमा मृतक शेर बहादुर लामाकी श्रीमती कान्छि लामा, नर बहादुर तामाङ, उनकी श्रीमति निरमाया र छोरी रेनिसा तामाङ रहेका छन्।
