जडिबुटीमा बिहीबार मध्यराति छुरा प्रहार गरी एक युवाको हत्या प्रयास भएको छ।
मध्यराति १२ बजे छुरा दोलखा गैरीमुडी गाउँपालिका–७ का २४ वर्षीय सुवास बुढाथोकीलाई छुरा प्रहार गरिएको हो। महानगरीय प्रहरी बृत्त कोटेश्वरका अनुसार उनी काँडाघारी बस्थे। उनको चिन्ताजनक अवस्थामा वीर अस्पतालमा उपचार भइरहेको छ।
छुरा प्रहारमा संलग्न गैरीमुडी गाउँपालिका–७ कै १९ वर्षीय डिम्पल घिसिङ र सिनामंगल नगरपालिका–९ का २० वर्षीय आशिष बयलकोटीलाई शुक्रबार बिहान ४ बजे कोटेश्वर बृत्तले पक्राउ गरेको छ।
बृत्तकी प्रहरी निरीक्षक एलिजा गिरीका अनुसार लोकन्थलीको एउटा टहरामा लुकेर बसेका उनीहरूलाई घटना गराएको चार घन्टामा पक्राउ गरिएको हो। लागुऔषध प्रयोगकर्ता उनीहरूको साथबाट प्रहरीले एक थान खुँडा बरामद गरेको छ।
पेटमा छुरा प्रहार गरिएका बुढाथोकी गम्भीर छन्। वीर अस्पतालले उनको अपरेसन गर्ने तयारी थालेको छ। ‘घटना के कारणले गराइएको हो भन्ने विषय खुलिसकेको छैन,’ प्रहरी निरीक्षक गिरीले भनिन्। दुबैलाई हिरासत लिएर प्रहरीले अनुसन्धान थालेको छ।