पूर्वका विभिन्न स्थानमा परेको अविरल वर्षाका कारण मृत्यु हुनेको संख्या २१ पुगेको छ।
आज मात्र झापा, मोरङ र सुनसरीमा १/१ जना गरी ३ जनाको मृत्यु भएपछि प्रदेश नम्बर १ मा बाढी पहिरोमा परेर मृत्यु हुनेको संख्या २१ पुगेको हो।
१ नम्बर प्रदेश प्रहरी कार्यालय विराटनगरका सूचना अधिकारी प्रहरी वरिष्ठ उपरीक्षक किशोर कुमार दाहालका अनुसार आज झापाको मेचीनगर नगरपालिका १३ का गंगाराम प्रसाईको अढाई वर्षीय छोरा अजित प्रसाईको खोलाले बगाएर मृत्यु भएको छ।
बिहान ७ बजे बुवा खेतमा गएको र छोराले बुवालाई पछ्याउँदै जाने क्रममा स्थानीय फुलवासा खोलाले उनलाई बगाएको थियो। आफ्नै छोरालाई खोलाले बगाउँदै गरेको स्वयम बुवाले नै देखेपछि स्थानीयवासी समेतको सहयोगमा तत्काल उद्धार गरे पनि उनको उपचारको क्रममा बिर्तामोडको बिएण्डसी अस्पतालमा मृत्यु भएको हो।
मोरङको रंगेली नगरपालिका ९ मा रहेको गेउरिया खोला किनारामा एक जना युवकको बेवारिसे लाश भेटिएको छ।
उक्त लास खोलाले बगाएर ल्याएको स्थानिय प्रहरीको भनाई उद्धृत गर्दै प्रदेश प्रहरीले जनाएको छ। अन्दाजी वर्ष २८ को जस्तो देखिने पुरुषको लाश गेउरिया खोला किनारामा फेला परेको प्रहरी वरिष्ठ उपरीक्षक दाहालले जानकारी दिए। मृतकको हालसम्म पहिचान खुल्न सकेको छैन।
यस्तै, सुनसरीको हरिनगरा गाउँपालिका २ का अकबल मियाको १२ बर्षीय छोरा तोसिब मियाको स्थानीय नहरमा डुबेर मृत्यु भएको छ। भुटाह-सिसुवा धरमपुर सडक खण्डमा पर्ने नहरको डिलबाट चिप्लिएर नहरमा डुब्दा उनको मृत्यु भएको हो।
१ नम्बर प्रदेशको भोजपुरमा बाढी पहिरोबाट सबभन्दा धेरै ५ जनाको मृत्यु भएको १ नम्बर प्रदेश कार्यालय विराटनगरले जनाएको छ। ओखलढुंगामा ४, खोटाङमा ३ र झापामा पनि बाढीबाट मृत्यु हुनेको संख्या ३ पुगेको छ।
यस्तै, उदयपुरमा २ जनाको मृत्यु भएको छ भने ईलाम, पाँचथर, मोरङ, संखुवासभामा एक/एक जनाको मृत्यु भएको प्रदेश प्रहरीले जनाएको छ। बाढी र पहिरोबाट बेपत्ता हुनेको संख्या एक नम्बर प्रदेशमा ९ पुगेको छ। प्रदेश प्रहरीका अनुसार बाढीपहिरोबाट घाइते हुनेको संख्या १६ र बाढी पहिरोको कारण पूर्ण विस्थापितको संख्या ६ हजार ३ सय १ रहेको प्रदेश प्रहरीका सूचना अधिकारी प्रहरी वरिष्ठ उपरीक्षक दाहालले सेतोपाटीलाई जानकारी दिए।