नेपालबाट जापानतर्फ लागुऔषध ओसारपसार तथा कारोबारमा गिरोह सक्रिय रहेको पाइएको छ।
नेपाल प्रहरीको लागुऔषध नियन्त्रण ब्युरोले चार किलो २ सय ग्राम एमफेटामाइन (आइसिइ)सहित पोर्चुगिच नागरिकलाई पक्राउ गरेसँगै लागुऔषध तस्करीको नेपाल–जापान ट्रान्जिट खुलेको हो।
एयर इन्डियाबाट दिल्ली हुँदै जापान जान लागेका ती नागरिकलाई ब्युरोले शुक्रबार साढे १ बजे त्रिभुवन विमानस्थलबाट पक्राउ गरेको थियो।
पक्राउ पर्नेमा २६ वर्षीय मेन्डेस पेरेरा छन्। ब्युरोले पक्राउ परेका पेरेरालाई आइतबार सार्वजनिक गरेको छ।
ब्युरो प्रमुख प्रहरी नायब महानिरीक्षक दिनेश अमात्यका अनुसार पेरेरा बुधबार नेपाल आएको खुलेको छ।
नेपाल आएपछि उनी गिरोहसँग भेटेर एमफेटामाइन लिई जापान गन्तव्य तय गर्दै थिए।
पक्राउ परेका पेरेराले आफूलाई नेपालमा कुनै व्यक्तिले जापान पुर्याइदिन सो लागुऔषध दिएको प्रहरीलाई बयान दिएका छन्।
पक्राउ परेको लागुऔषधको मूल्य चार करोड रुपैयाँ बढी पर्न जान्छ।
‘यो उच्चस्तरको लागुऔषधमध्येमा पर्छ,’ ब्युरो प्रमुख अमात्यले सेतोपाटीसँग भने, ‘उच्च घरानाका प्रयोगकर्ताले यस्तो लागुऔषध सेवन गर्छन्।’
लामो समयसम्म शारीरिक उत्प्रेरणा, उत्तेजना दिने भएकाले यदाकदा खेलाडीले पनि एमफेटामाइन प्रयोग गर्ने गरेको पाइन्छ।
महँगो पर्ने भएकाले धनाढ्यहरूले यस्तो लागुऔषध प्रयोग गर्ने गरेको अमात्यले बताए।
नेपालमा यो लागुऔषध निकै कम मात्रामा पाइन्छ। बर्मा तथा थाइल्याण्डबाट प्रायः एमफेटामाइन नेपाल भित्रिने गरेको दाबी प्रहरीको छ। त्यहाँ एमफेटामाइन लागुऔषधका प्रयोगकर्ता अत्यधिक छन्।
नेपाल ल्याएर अर्को मुलुक एमफेटामाइन ओसारपसारमा ठूलै गिरोह सक्रिय हुनसक्ने अनुमान प्रहरीको छ।
‘प्रारम्भमा पक्राउ परेका पेरेरा भरियाजस्ता देखिन्छन्, उनले कसबाट उक्त लागुऔषध लिए र जापानमा कहाँ पठाउँछन् भन्ने अनुसन्धान भइरहेको छ,’ अमात्यले भने, ‘नेपाल-जापान लागुऔषध तस्करीको नयाँ रूट पत्ता लागेको छ। अनुसन्धानपछि कारोबारीसम्म पुग्छौं।’
पक्राउ परेका पेरेरालाई लागुऔषध नियन्त्रण ऐन अन्तर्गत आइतबार म्याद थप गरी अनुसन्धान थालिएको छ।
विमानस्थलको आगमन कक्षमा अध्यागमन जाँचपास भएपछि सबै यात्रुलाई भन्सारले चेकजाँच गर्ने गरेको छ।
त्यहाँ एक्सरे मेसिन भए पनि भन्सार कर्मचारीले मात्र प्रयोग गर्ने गरेका छन्। यसको फाइदा उठाउँदै विभिन्न मुलुकबाट लागुऔषध नेपाल भित्र्याएर कारोबार गर्न गिरोहलाई सजिलो हुने गरेको छ।