देशका विभिन्न ठाउँमा भएका सवारी दुर्घटनामा चार जनाको मृत्यु भएको छ। प्रहरीका अनुसार उदयपुर, दाङ, कैलाली र नवलपरासी (पश्चिम)मा छुट्टाछुट्टै दुर्घटना हुँदा चार जनाको ज्यान गएको हो।
उदयपुर:
त्रियुगा नगरपालिका-९ गैरुनस्थित सडकमा स ५ प ३६३७ नम्बरको मोटरसाइकलको ठक्करबाट सोही ठाउँ बस्ने ७० वर्षीया मनमाया श्रेष्ठको सोमबार राति मृत्यु भएको छ। ठक्करबाट गम्भीर घाइते भएकी उनको त्रियुगा अस्पतालमा उपचारको क्रममा मृत्यु भएको हो।
दाङ:
गढवा गाउँपालिका-५ बाँकीचोकस्थित सडकमा लु ५ प ९७११ नम्बरको मोटरसाइकलको ठक्करबाट गम्भीर घाइते भएका पैदलयात्री सोही गाउँपालिका सोनपुरुवा बस्ने ६० वर्षीय गंगाराम यादवको लमही अस्पताल दाङमा उपचारको क्रममा सोमबार राति मृत्यु भएको छ। मोटरसाइकल र चालकलाई प्रहरीले नियन्त्रणमा लिएको छ।
कैलाली:
गौरीगंगा नगरपालिका-८ लिक्मास्थित भित्री सडकमा सोमबार साँझ से ४ प ७६११ नम्बरको मोटरसाइकलको ठक्करबाट गम्भीर घाइते भएका पैदलयात्री सोही नगरपालिका शिविर बस्ने ४० वर्षीय धिमु चौधरीको मृत्यु भएको छ।
उपचारको लागि कोहलपुर लैजाने क्रममा उनको बाटैमा मृत्यु भएको प्रहरीले जनाएको छ।
नवलपरासी(पश्चिम):
सुनवल नगरपालिका-१२ हरनैयास्थित सडकमा लु ४० प ३७९८ नम्बरको मोटरसाइकल अनियन्त्रित भई मंगलबार बिहान दुर्घटना हुँदा चालक रामग्राम नगरपालिका-१० बस्ने ३५ वर्षीय अम्मरजित चौधरीको घटनास्थलमै मृत्यु भएको छ।
