सहकारी ठगीमा फरार एक महिलालाई प्रहरीले पक्राउ गरेको छ।
एक महिना कैद र १८ लाख जरिवानाको फैसला सुनाइएकी काठमाडौं २६ की ३२ वर्षीया प्रतिमा सिटौलालाई केन्द्रीय अनुसन्धान ब्युरोको टोलीले नुवाकोटबाट पक्राउ गरेको हो।
अप्सरा पौडेलसमेतको जाहेरीले २०७१ चैत ७ गते उच्च अदालत पाटनबाट सजाय तोकिएकी उनलाई सोमबार पक्राउ गरी प्रहरीले फैसला कार्यान्वयनका लागि जिल्ला अदालत काठमाडौं पठाएकोमा अदालतले केन्द्रीय कारागार सुन्धारा पठाएको ब्युरोले जनायो।
२०७०/७१ मा काठमाडौं टोखा नगरपालिका वडा नं. ९ स्थित नाङ्गलो दिप सेभिङ्ग एण्ड क्रेडिट को अपरेटिभकी सञ्चालक सदस्य रहेकी सिटौलासहितका पदाधिकारीले २०२ जना सर्वसाधारण व्यक्ति तथा निक्षेपकर्ताहरुलाई ठगेको अभियोग लागेको छ।
आकर्षक सेवा, सुविधा र उपहार दिन्छौँ भन्दै उनीहरुले एक करोड त्रीयासी लाख अठार हजार आठ सय एकहत्तर रुपैयाँ ठगी गरेको अभियोग छ।
ठगी गर्नेमध्ये सिटौलालाई एक महिना कैद र १८ लाख ३१ हजार ८८७ जरिवाना हुने ठहर भएको थियो।