मोरङ प्रहरीले विराटनगरको एकै वडाबाट चार हजार चार सय ६५ लिटर घरेलु मदिरा बरामद गरेको छ। विराटनगर महानगरपालिका-१२ बखरी टोलका विभिन्न स्थानबाट मंगलबार उक्त परिमाणको मदिरा बरामद गरिएको मोरङ प्रहरीले जनाएको छ।
घरेलु मदिरा नियन्त्रणका लागि वडा प्रहरी कार्यालय विराटनगरका प्रहरी नायब उपरीक्षक बेदप्रसाद गौतम र जिल्ला प्रहरी कार्यालयका प्रहरी नायब उपरीक्षक राजकुमार खिउजुको टोली बखरी पुगेको थियो।
घरेलु मदिरा उत्पादन र बिक्री वितरण तीव्र भइरहेको सूचनाका आधारमा गएको प्रहरी टोलीले एकै वडाबाट सो परिमाणको घरेलु मदिरा बरामद गरेको हो।
सो वडाका जगदीश कामत, साजन कामत, रामचन्द्र यादवसमेतको घर तलासी लिँदा उच्च मात्रामा मदिरा बरामद भएको डिएसपी खिउजुले बताए। प्रहरीले बरामद सो मदिरा मंगलबार नष्ट गरेको छ।
‘घरेलु मदिराको उद्योग नै रहेको सूचनाका आधारमा हामी गएका थियौं,’ डिएसपी गौतमले भने, ‘यहाँबाट उत्पादन भएको मदिरा मोरङभरि जाने गरेको खुलेको छ।’
मोरङका प्रहरी उपरीक्षक विश्व अधिकारीले समाज सुधारका क्रममा घरेलु मदिरा नियन्त्रणलाई तीव्रता दिइएको बताए। उनले घरेलु मदिराका कारण त्यसक्षेत्रमा भइरहेका सामाजिक विकृति न्यूनीकरण गर्न प्रहरी सफल भएको बताए।