काठमाडौं दरबार्मागस्थित डेजाभू क्लबका सञ्चालक मनोज श्रेष्ठ बैंकिङ कसूर तथा ठगीमा एक करोड धरौटी बुझाएर छुटे लगत्तै फेरि पक्राउ परेका छन्।
साढे ३ करोड रुपैयाँ ठगीको आरोपमा उनी फेरि पक्राउ परेका महानगरीय प्रहरी परिसरले जनाएको छ।
उनीमाथि आवश्यक अनुसन्धान भइरहेको परिसरले जनाएको छ।
ड्रागन एयरको जहाजमा हङकङबाट काठमाडौं उत्रिएका ३७ वर्षीय श्रेष्ठलाई साउन १२ गते राति अध्यागमन विभागले पक्राउ गरी प्रहरीलाई बुझाएको थियो।
श्रेष्ठलाई महानगरीय प्रहरी परिसरको अनुरोधमा नेपाल प्रहरीको इन्टरपोल शाखाले ‘डिफ्युजन नोटिस’ (एक–अर्कामा सूचना आदान-प्रदान गर्ने) जारी गरेको थियो। प्रहरीको सर्वाधिक खोजीमा रहेका उनलाई हङकङ प्रहरीले दिएको सूचनाको आधारमा अध्यागमनले समातेर महानगरीय प्रहरी परिसरलाई जिम्मा लगाएको थियो।
परिसरका अनुसार दुई करोडको चेक बाउन्स मुद्दा र तीन करोड पचास लाख ठगी मुद्दामा श्रेष्ठ प्रहरीको खोजीमा थिए।
डेजाभू क्लबको हैसियतमा रहँदा उनले कम्पनी मर्मत गर्न भनी विश्वराम श्रेष्ठबाट दुई करोड लिएका थिए। सो रकम फिर्ता गर्न उनले चेक दिएकोमा खातामा पैसा नभएपछि बैंकले चेक बाउन्स गरिदिएको थियो।
पीडितले पटक-पटक अनुरोध गर्दा पनि मनोजले पैसा नदिएपछि परिसरमा २०७५ पुस १३ गते बैंकिङ कसूरमा जाहेरी परेको थियो।
जाहेरी परेपछि उनी नेपालबाट भागेर लामो समय हङकङ बस्दै आएका थिए।
ठगीमा श्रेष्ठविरूद्ध उनै विश्वरामले जिल्ला अदालत काठमाडौंमा तीन करोड पचास लाख रुपैयाँको बिगो माग्दै मुद्दा दायर गरेका थिए। दुवै मुद्दामा प्रहरीले श्रेष्ठलाई ‘डिफ्युजन नोटिस’ जारी गरेको थियो।