कीर्तिपुर नगरपालिका वडा नम्बर ६ तौदह पेट्रोल पम्प अगाडि डिप बोरिङबारेको छलफलमा कुटाकुट भएको छ।
डिप बोरिङबाट जमिनमुनिको पानी निकाल्दा तौदह सुक्ने भन्दै स्थानीय बासिन्दाले अवरोध गरेका हुन्।
डिप बोरिङ खन्ने जिम्मा लिएको ओमअदिति इन्टरप्राइजेजका प्रतिनिधि निराजन थापाले बोलिरहँदा एक स्थानीय बासिन्दाले प्रतिप्रश्न गरेका थिए।
त्यस क्रममा बिबाद भएपछि कुर्सी हानाहान भएको हो। कुर्सीले लागेर मइना बयलकोटी घाइते भएकी छन्। दक्षिणकाली वडा नम्बर १ का बासिन्दासँग छलफल नै नगरी यहाँ डिप बोरिङबाट पानी निकाल्न लागेपछि स्थानीय बासिन्दाले विरोध गरेका थिए।
छलफलबाटै समस्याको समाधान निकाल्ने उद्देश्यले वडाध्यक्षसहितको सार्वजनिक सुनुवाइ कार्यक्रम राखे पनि बिबाद भएको हो।
