शुक्रबार बिहान धादिङको बेनीघाटरोराङ–३ सलाङघाटमा भएको बस दुर्घटनामा परी मृत्यु हुनेको संख्या ८ पुगेको छ भने २५ जना अझै हराइरहेका छन्।
अहिलेसम्म मृतकमध्ये ५ जनाको मात्रै सनाखत भएको जिल्ला प्रहरी कार्यालय धादिङले जनाएको छ।
धादिङका प्रहरी उपरीक्षक राजकुमार वैदवारका अनुसार भारतीय नागरिक अजय दास र विजय कुर्मी, बसका कण्डक्टर ऋषि उप्रेतीको शवको शुक्रबार नै पहिचान भएको थियो।
धादिङको कृष्णभीर नजिकै त्रिशूली नदीमा फेला परेका २ शवको पनि पहिचान भएको छ। पहिचान भएका ती शव सर्लाहीको मलंगवा १ निवासी ४० वर्षका सुनिलकुमार श्रीवास्तव र उनकी श्रीमती ३५ वर्षीया नीमा श्रीबास्तवे भएको उनीहरूका आफन्तमार्फत् पहिचान गरिएको हो ।
दुर्घटनामा परेर हराइरहेका व्यक्तिहरूको खोजीका लागि शनिबार बिहानैदेखि नेपाल प्रहरीको धादिङ, चितवन, गोरखा, तनहुँ र नवलपरासीका त्रिशूली नदी आसपासका स्थानीय यूनिटहरूसँग समन्वय गरी खोजतलास भइरहेको छ।
यसैगरी, सशस्त्र प्रहरी बल विपद व्यवस्थापन गण कुरिनटारको टोलीले डुंगाको प्रयोग गरी बेपत्ताको खोजी गरिरहेको प्रहरी उपरीक्षक वैदवारले जानकारी दिए।
कन्डक्टर उप्रेतीको शव गोर्खा जिल्ला तर्फको त्रिशूली किनारमा फेलापरपछि प्रहरीले दिएको तस्बिरका आधारमा उप्रेतीका आफन्तले शवको पहिचान गरेका हुन्।
शुक्रबार चितवनको देवघाट र जुगेडीमा फेला परेका २ जनाको भने अझै सनाखत हुन नसकेको प्रहरी उपरीक्षक वैदवारले बताए।
दुर्घटनामा परेर ज्यान गुमाएका एक महिला र एक बालिकाको सनाखत हुन सकेको छैन। घटनास्थल र शव राखिएका अस्पतालमा दुर्घटनामा बेपत्ता भएका व्यक्तिका आफन्तहरू आउने क्रम बढ्दै गएको छ।
शुक्रबार बिहान सर्लाहीको मङ्लगवाबाट काठमाडौंतर्फ जाँदै गरेको न्यू सृष्टि डिलक्सको ना ६ ख ७४६९ नम्बरको बस सडकबाट २०० मिटर तल त्रिशूली नदीमा खसेर दुर्घटना भएको थियो।