बागलुङमा एक दलित दम्पत्तिको धारिलो हतियार प्रहार गरी हत्या गरिएको छ। बागलुङ प्रहरीका अनुसार ढोरपाटन नगरपालिका ८ बोबाङको अङ्गरेका ६४ वर्षीया भानबहादुर कामी र उनकी श्रीमती ६० वर्षीया बिमा कामीको आइतबार हत्या गरिएको हो।
बागलुङका प्रहरी उपरीक्षक नवराज भट्टका अनुसार भानबहादुरको शव घरछेउको मकैबारीमा भेटिएको छ। उनकी श्रीमतीको शव भने घरभित्रै विभत्स अवस्थामा फेला परेको भट्टले बताए।
शवको मुचुल्का उठाउन बुर्तिबाङबाट प्रहरी टोली घटनास्थल पुगेको छ। हत्या के कारण भयो भन्ने केही पनि खुल्न नसकेको प्रहरी उपरीक्षक भट्टले बताए।
‘शरीरमा जथाभावी धारिलो हतियार प्रहार गरी हत्या गरिएको भेटिएको छ,’ उनले भने, ‘घटना कसले के कारण घटायो भन्ने अनुसन्धान भइरहेको छ।’ हत्या गर्ने व्यक्तिको खोजीमा प्रहरी जुटिरहेको उनले बताए।
