ललितपुरको महालक्ष्मी नगरपालिका ९ मा डिप बोरिङमा लगाइएको ताला खोलिएको छ।
आइतबार वडा ९ का अध्यक्ष बासुदेव शर्मा गौतम, वडा ८ का वडाध्यक्ष विश्वराज श्रेष्ठ र नगर प्रमुख रामेश्वर श्रेष्ठबीच भएको छलफलपछि ताला खोलिएको हो।
‘हामीबीच केही असमझदारी भएको थियो। हामीले छलफल गरेर कुरा मिलाइसक्यौ,’ वडाध्यक्ष गौतमले भने,‘ अब उपभोक्ता समितिले पनि परीक्षण गरेर मात्रै पानी वितरण गर्ने भएको छ।’
बर्खामै डिप बोरिङले ढुंगे धारामा पानी सुकेपछि स्थानीय आन्दोलित थिए।
स्थानीयले आन्दोलन गरेपछि वडा ९ का वडाध्यक्ष बासुदेव शर्मा गौतमले नै सूचना निकाली गत आइतबार (साउन १९ गते) बन्द गर्न लगाएका थिए।
लुभू र डाँडाथोकका घरमा हिउँदमा पानीको अभाव टार्न तीनचलमा डिप बोरिङ गरिएको थियो। परम्परागत ढुंगे धाराको पाँच सय मिटर नजिकै डिप बोरिङ गरी भूमिगत पानी निकालेपछि बर्खामै धारामा पानी सुकेको थियो।
प्राकृतिक मुहान सुक्ने गरी डिप बोरिङबाट पानी निकाल्न नहुने भन्दै स्थानीयले आवाज उठाएपछि वडाध्यक्ष शर्माले पानी निकाल्न रोक लगाइएका थिए।
त्यस्तै, त्यहाँको भौतिक निर्माणको काम फेरि सञ्चालनमा आउने वडाध्यक्षले बताए।
एक हप्तादेखि डिप बोरिङको कम्पाउण्डमा ताला लागेपछि काम हुन सकेको थिएन।
