राष्ट्रिय गौरबको भेरी–बबई बहुउद्देश्यीय डाइभर्सन आयोजनास्थलमा पिकनिक खान गएका दुई जनाको नदीमा डुबेर मृत्यु भएको छ।
बाँकेबाट पिकनिक खान गएका बर्दियाका प्रवीण बस्याल र दैलेखका हेमन्त बडुवालको मृत्यु भएको इलाका प्रहरी कार्यालय छिन्चुका प्रहरी निरीक्षक निरोज चौलागाईंले जानकारी दिएका छन्।
चौलागाईका अनुसार शनिबार बाँकेबाट एउटा बस र जिपमा ३४ जना पिकनिकका लागि भेरीगंगा नगरपालिका–५ गेरुवानीमा आएका थिए। गएकामध्ये तीन जना बबई नदीमा पौडी खेल्न गएका थिए।
तीमध्ये बर्दिया बढैयाताल गाउँपालिका–३ सिमराका २१ वर्षीय प्रवीण बस्याल र दैलेख आठबीस नगरपालिका–८ तिलेपाटाका २६ वर्षीय हेमन्त बडुवाल बेलुका साढे पाँच बजेतिर बेपत्ता भएका थिए।
प्रहरी निरीक्षक चौलागाईका अनुसार बढुवालको शव शनिबार बेलुका साढे सात बजेतिर फेला परेको थियो भने बस्यालको शव आइतबार बिहान फेला परेको थियो।