भारतबाट अवैध रूपमा कुखुरा ओसारपसारमा संलग्न एक व्यक्तिले ‘प्रहरीलाई लाइन मिलाइदिनुपर्यो’ भन्दा आफैं फन्दामा परेका छन्।
पर्सा वीरगञ्ज महानगरपालिका-२२ का ३५ वर्षीय उपेन्द्रप्रसाद यादवलाई बारा प्रहरीले मंगलबार राति पक्राउ गरेको हो।
राति सवा आठ बजे जीतपुरसिमरा उपमहानगरपालिका-७ को इलाका प्रहरी कार्यालय जितपुर पुगेका उनलाई प्रहरीले त्यहीँ पक्राउ गरेको हो।
आफू भारतबाट कुखुरा ल्याई नेपालमा ओसारपसारको काम गर्ने गरेको र सोको ‘लाइन मिलाइदिनुपर्यो’ भन्दै उनी इलाका प्रहरी कार्यालयमै पुगेका थिए।
बाराका प्रहरी उपरीक्षक सानुराम भट्टराईका अनुसार उनलाई दस हजार रुपैयाँसहित पक्राउ गरिएको छ।
‘उनले पाइन्टको गोजीबाट पैसा निकाल्दै तपाईंलाई लाइन मिलाउन आएको हो। तपाईंले नखाए पनि हामीले त काम गर्छौं भन्दै प्रहरीलाई दुर्व्यवहार गरेका थिए,’ भट्टराईले भने।
भट्टराईका अनुसार इलाका पुगेका यादवलाई प्रहरीले सुरूमा ‘तपाईं जानुहोस्’ भनी पठाउन खोजेका थिए। तर, पैसा नै निकाल्दै ‘लाइन मिलाउनैपर्छ’ भन्न थालेपछि समातिएको हो।
पक्राउ परेका यादवमाथि अनुसन्धान तथा आवश्यक कारबाही थालिएको उनले बताए।
