तुलसीपुर उपमहानगरपालिकाका मेयरले विद्यालय समयमा विभिन्न काम लिएर आउने शिक्षकलाई भेट नदिने भएका छन्।
मेयर घनश्याम पाण्डेले काजको बहानामा कतिपय शिक्षकहरू स्कुलको समयमा पनि स्कुलमा नबस्ने भएकाले यस्तो प्रवृत्तिको अन्त्यका लागि आफूले सो कदम उठाउनु परेको बताए।
‘शिक्षकलाई १० देखि ५ सम्म भेट्दिनँ। मलाई त्यो समयमा कोही पनि भेट्न नआउनू होला,’ मेयर पाण्डेले भने।
तुलसीपुर उपमहानगरपालिकाले शिक्षाको अवस्था सुधारका लागि शिक्षक मूल्यांकन प्रक्रिया अगाडि बढाउने पनि जनाएको छ।
उपमहानगरपालिकाले प्रधानाध्यापक र प्रधानाध्यापकले शिक्षकहरूसँग कामको करार सम्झौता गर्ने तयारी गरेको छ।
‘कामको लक्ष्य निर्धारण नगर्दा पनि उपलब्धि सही ढंगले आउन सकिरहेको छैन। अब यसरी चल्दैन। केही गर्न पर्छ,’ पाण्डेले भने।
उनले कार्यसम्पादन मूल्यांकन बनाएर त्यसको निरन्तर अनुगमन समेत गरिने बताए।
काम गर्ने जाँगर नहुनेलाई तलब पकाउनका लागि मात्रै शिक्षक बन्ने अधिकार नरहेको हुँदा जाँगर नहुनेहरूले शिक्षन पेशा त्याग्नुपर्ने उनले बताए।
तुलसीपुर उपमहानगरपालिकाका ८३ सामुदायिक विद्यालयका प्रधानाध्यापकसँगको अभिमुखीकरण कार्यक्रममा नगरप्रमुख पाण्डेले सो कुरा बताएका हुन्।
त्यस्तै उनले तुलसीपुरलाई प्राविधिक शिक्षाको केन्द्रका रुपमा विकास गर्नका लागि उपमहानगरपालिकाले सामुदायिक विद्यालयलाई अनुदान दिएको भए पनि काम सही ढंगले अगाडि बढ्न नसकेकोप्रति असन्तुष्टि जनाए।
‘एसइईमा राम्रो नतिजा ल्याउँदैनन् अनि कसरी प्राविधिक विषय पढ्ने?,’ पाण्डेले भने।
उनले विद्यार्थीलाई सिकाउने, विद्यालयमा टिकाउने र विकाउने बनाउनका लागि विद्यालय प्रशासन गम्भीर ढंगले लाग्नुपर्ने सुझाए।
प्रधानाध्यापकको हातमा विद्यालयको भविष्य हुने भएकाले विशेष गरेर प्रधानाध्यापकहरू थप जिम्मेवारीपूर्वक लाग्नुपर्ने उनको तर्क छ।
त्यस्तै, उनले विद्यालय व्यवस्थापन समितिमा गैर अभिभावकहरू रहेको भन्दै तत्काल सुधारका लागि अगाडि बढ्न आग्रह समेत गरे।
धेरै प्रधानाध्यापकहरू काजका नाममा धेरै जसो विद्यालय बाहिर रहेको गुनासो आएको भन्दै उनले अनिवार्य काज लिनुपर्ने र त्यसमा शिक्षा समितिको स्वीकृति हुनुपर्ने कुरामा जोड दिए।