हङकङको क्याथे प्यासिफिक एयरवेजका प्रमुख कार्यकारी निर्देशक रुपर्ट होगले शुक्रबार राजीनामा दिएका छन्।
होगले हवाइसेवाका कर्मचारीको सरकार विरोधी प्रदर्शनमा सहभागिताबारे भइरहेको छानबिनका बीच राजीनामा दिएका हुन्।
एयरवेजले होगले राजीनामा दिएको खबर दिँदै हङकङ एयर क्राफ्ट इन्जिनियरिङ कम्पनीका प्रमुख अगस्टस टाङ नयाँ निर्देशक नियुक्त भएको बताएको छ।
क्याथेका अध्यक्ष जोन स्लोसरले क्याथेको आफ्नो प्रतिष्ठामाथि प्रश्न उठेको र उडानको सुरक्षाका कारण आफ्नो ब्राण्डलाई तनाव भएको बताएका छन्।
'यो पछुतो लाग्ने कुरा हो किनकी हामीले सुरक्षालाई पहिलो प्राथमिकतामा राखेका थियौँ। हाम्रो व्यवस्थापन टोलीलाई परिवर्तन गर्ने बेला भएको छ जसले निर्धक्क भई एयरवेजलाई नयाँ उचाइमा पुर्याउँछ’, अध्यक्ष स्लोसरले भने।
त्यस्तै मुख्य ग्राहक र वाणिज्य अधिकारीका रूपमा पौल लुले पनि राजीनामा दिएको एयरलाइन्सले जनाएको छ।
लुको ठाउँमा हङकङ एक्सप्रेसका प्रमुख रोनाल्ड लामलाई नियुक्त गरिएको बताइएको छ।
निर्देशक होगले गएको हप्ता तनावपूर्ण रहेको बताउँदै त्यसको सम्पूर्ण जिम्मेवार कम्पनीका प्रमुख हुनुको नाताले लु र उनी आफैं रहेको बताएका छन्।
क्याथे एयरवेजले सरकार विरोधी आन्दोलनलाई समर्थन गरेकोमा दुई विमान चालकलाई समेत निकालेको थियो।