मनाइयो गाईजात्रा

सेतोपाटी संवाददाता

काठमाडौं, साउन ३१

काठमाडौं उपत्यकासहित देशका विभिन्न भागमा शुक्रबार गाईजात्रा पर्व मनाइएको छ। खासगरी दिवङ्गत भएका आफन्तको सम्झनामा नेवारहरुले यो पर्व मनाउने गर्दछन्।

१ वर्षयता दिवंगत भएकाहरुको सम्झनामा गाई वा मानिसलाई गाईका रूपमा सिङ्गारी शहर परिक्रमा गराउने चलन छ। यस दिन दिवंगत भएका परिवारलाई दूध, फलफूल, रोटी, चिउरा, दहीका साथै अन्न र द्रव्य दान गर्ने चलन छ। यो पर्व मनाउँदा मृतकको आत्माले शान्ति पाउने विश्वास रहीआएको छ। यस दिन सामाजिक विकृतिप्रति पति व्यङ्ग्यात्मक प्रदर्शन तथा नाचगान गर्ने चलन छ।

राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक बेहोर्नुपर्छ भन्ने देखाउन जनतालाई आ–आफ्नो मरेका व्यक्तिका नाममा गाईजात्रा निकाली शहर परिक्रमा गराउनु भनी आज्ञा दिएको ऐतिहासिक तथ्य छ ।

यतिले पनि रानीको मन शान्त हुन नसकेपछि विभिन्न प्रकारका प्रहसन तथा व्यङ्ग्यात्मक कार्यक्रम गराउने आदेश दिएअनुरूप जात्राको प्रचलन चलेको भन्ने जन श्रुति पाइन्छ। यसै बेलादेखि प्रचलनमा आएको गाईजात्रा हनुमानढोकास्थित राजप्रासाद भएर जानुपर्ने प्रथा अहिले पनि कायमै छ । देशका विभिन्न शहरमा गाईजात्रा मनाइने भए पनि उपत्यकामा यसको विशेष रौनकता हुन्छ। (राससको सहयोगमा)

तस्वीरमा हेर्नुहोस् कीर्तिपुर र भक्तपुरमा मनाइएको गाईजात्रा पर्व