श्रीलंका सरकारले ७० वर्षीया तिकिरी हात्तीलाई शहर डुलाइएकोबारे अनुसन्धान गर्ने भएको छ।
गत साता विश्व हात्ती दिवसको अवसरमा थाइल्याण्डको सेभ इलेफेन्ट फाउन्डेसनले बूढी तिकिरीको हाड देखिएको तस्बिर सार्वजनिक गरेको थियो।
दुब्लाएर हाड करङ देखिएकी एउटा हात्तीको तस्बिर सामाजिक सञ्जालमा भाइरल भएको थियो।
बुढ्यौलीले छोएर शरीरमा जाँगर नहुँदा पनि मान्छेहरू तिकिरीलाई आराम गर्न दिएका थिएनन्।
बिहीबार सकिएको पेराहेरा मेलामा बूढी तिकिरी अरू ६० वटा हात्तीसँगै १० दिन सहर घुमेकी थिई।
पेराहेरा मेलामा हात्तीहरूलाई विभिन्न पहिरनमा सजाएर साँझदेखि अबेर रातिसम्म सहरमा घुमाइन्छ।
चर्को आवाज, चम्किलो प्रकाश र नाचगान गर्ने मानिसहरूसँगै हिँडने हात्तीलाई छोएर मानिसहरू आफूहरूलाई भाग्यमानी ठान्छन्।
‘पहिरनले उनको सुकेको जिउ र कमजोर अवस्था कसैले देख्दैनन्। उनको टाउकोमा लगाइएको चम्किलो प्रकाशले कोही पनि उनका आँखाबाट बग्ने आँशु देख्दैनन्। उनी कसरी पाइला चाल्छिन् भन्ने पनि कसैले मेसो पाउँदैनन्,’ फाउन्डेसनले फेसबुक पेजमा लेखेको थियो,‘यदि हामी अरू कसैलाई पीडा दिन्छौं भने त्यो कसरी मेला भयो, त्यो कसरी धर्म भयो?’
फाउन्डेसनले यस्तो तस्बिरलाई अझै पनि स्वीकार्य ठान्छौं भने हामी हात्तीहरूका लागि शान्तिपूर्ण संसार बनाउन नसक्ने उल्लेख गरेको थियो।
‘अरूलाई प्रेम गर्नु, कसैलाई हानी नपुर्याउनु, दया र सहानुभुति राख्नु बुद्ध मार्ग हो। अहिले त्यही मार्ग पछ्याउनु पर्ने बेला हो,’ फाउन्डेसनले लेखेको थियो।
मेलाको अन्तिम दिन त तिकिरी हिँड्न नसकेर थचक्कै ढलेकी थिई।
पर्यटन तथा वन्यजन्तु मन्त्री जोन अमराटुङ्गाले हात्तीको स्वास्थ अवस्था कमजोर हुँदाहुँदै किन लगातार मेलाको परेडमा हिँड्न लगाइयो भन्नेबारे छानबिन गर्न आदेश दिएका छन्।
उनले वन्यजन्तु अधिकारीहरूलाई अन्य २०० हात्तीहरूलाई नराम्रो व्यवहार गरे/नगरेको बुझ्न लगाएका छन्।