पूर्वयुवराज पारस शाहले त्रिभुवन विमानस्थलमा आइतबार प्रहरी अधिकृतमाथि दुर्व्यवहार गरेको घटनामाथि प्रहरीले ‘आन्तरिक छानविन’ अघि बढाएको जनाएको छ।
महानगरीय प्रहरी कार्यालय रानीपोखरीका प्रहरी नायब महानिरीक्षक शैलेश थापाले घटना के कसरी भएको हो त्यसबारे विस्तृत छानविन गरी प्रतिवेदन दिन विमानस्थल प्रहरीलाई निर्देशन दिएका हुन्।
थापाले आइतबार पूर्वरानी कोमल शाहको थाइल्याण्ड प्रस्थानका क्रममा पूर्वयुवराज शाहले प्रहरीमाथि के कस्तो व्यवहार गरेको हो? विस्तृत रुपमा छानविन गरी प्रतिवेदन दिन विमानस्थल प्रहरीलाई निर्देशन दिएको बताए।
‘पूर्वरानी कोमल शाहको मुभमेन्टको क्रममा प्रहरीमाथि धकेलिएको समाचार र भिडिओ प्राप्त भएको विषयमा विस्तृत अनुसन्धान प्रतिवेदन बुझाउन विमानस्थल प्रहरीलाई निर्देशन भएको छ,’ थापाले सेतोपाटीसँग भने।
आइतबार पूर्वरानी कोमललाई पुर्याउन विमानस्थल पुगेका पूर्वयुवराज शाहले सुरक्षामा खटिएका प्रहरी नायब निरीक्षक (सई) ईश्वर खत्रीलाई धकेलेका थिए। सो घटनाका पीडित खत्रीले प्रहरीमा रिपोर्ट दिएका छैनन्।
तथापि, प्रहरी कर्मचारीमाथि दुर्व्यवहार भएको विषयमा कारबाही नभएको भन्दै सामाजिक सञ्जालमा आलोचना हुन थालेपछि प्रहरीले छानविन थालेको जनाएको हो।
यो पनि हेर्नुहोस्
विमानस्थलमा प्रहरीमाथि पूर्वयुवराज पारसको दुर्व्यवहार