पूर्वराजदूत केशवराज झाको हत्या एक वर्ष पुगेको छ। तर, उनको हत्या कसले गर्यो भन्ने ‘क्लू’सम्म प्रहरीले पत्ता लगाउन सकेको छैन।
गत वर्ष भदौ ४ गते बिहान आफ्नै निवासमा झा मृत फेला परेका थिए। उनीमाथि चक्कु प्रहार गरिएको थियो। उनको घाँटीमा गहिरो चोट लागेको थियो।
झालाई कसले किन हत्या गर्यो? भन्ने पाटोबाट अनुसन्धान थाले पनि प्रहरीले कसैलाई कठघरामा उभ्याउन नसकेको हो।
झाको हत्यामा संलग्न भएको आशंकामा प्रहरीले भदौ १ गते एक जनालाई पक्राउ गरेको छ।
झाको सुरक्षामा खटिएका सुरक्षा गार्ड सानुकान्छा तामाङलाई प्रहरीले गरेको हो।
उनलाई काभ्रेबाट पक्राउ गरिएको थियो। उनी यसअघि नै पक्राउ परेर छुटेका थिए।
‘शंकास्पद’ भन्दै पक्राउ गरिएका तामाङलाई तत्कालीन अवस्थामा ‘अभद्र व्यवहार’मा मुद्दा चलाइएको थियो।
झाको परिवारले उनै तामाङविरूद्ध किटानी जाहेरी दिएपछि फेरि पक्राउ गरिएको महानगरीय प्रहरी परिसरले जनाएको छ।
उनीमाथि महानगरीय प्रहरी परिसरले अनुसन्धान गरिरहेको छ।
‘किटानी जाहेरी आएपछि अनुसन्धानका लागि सानुकान्छालाई पक्राउ गरिएको हो,’ परिसर प्रमुख एसएसपी उत्तमराज सुवेदीले भने।
यसअघि झा हत्याको अनुसन्धान महानगरीय अपराध महाशाखाले गरिरहेको थियो।
सानुकान्छा पक्राउसँगै महाशाखाले हत्या अनुसन्धानको फाइल परिसर बुझाएको छ।
हालसम्म हत्यारा नजिकसम्म पुग्ने आधार नभेटिएको प्रहरीले स्वीकारेको छ। तर, अनुसन्धानको सिलसिला जारी राखिएको प्रहरीको भनाइ छ।
‘अनुसन्धान रोकिने कुरा हैन। यो निरन्तर चलिरहेको हुन्छ,’ एसएसपी सुवेदीले भने, ‘कुनै कुनै घटनामा अलि समय लाग्छ, यो पनि यस्तै प्रकृतिको घटना हो।’
झालाई उनको निवास बबरमहलमा हत्या गरिएको थियो।
झाको हत्या कसले र किन गर्यो भन्नेमा अनुसन्धान केन्द्रित रहेको एक अधिकृत बताउँछन्।
महाशाखाका अनुसार बबरमहल आसपासका तीन सयभन्दा बढी व्यक्तिलाई सोधपुछ गरिएको थियो। तथापि, हत्यारा घरमै छिर्दा कसैले थाहा नपाएको अनुसन्धान अधिकारी बताउँछन्।
यसकारण पनि झाको हत्या ‘रहस्यमय’ बन्न पुगेको छ।
महाशाखा प्रमुख एसएसपी सहकुल थापाका अनुसार यसबीचमा झाको हत्याका विभिन्न कारणबारे अनुसन्धान भएको थियो।
उनको हत्या आर्थिक कारणले हो कि भन्ने पक्षबाट पनि अनुसन्धान भयो। उनका बैंक खाता तथा स्टेटमेन्ट हेरिएको छ। ‘तर, खास कुरा पत्ता लाग्न सकेको छैन,’ थापाले भने।
झा सन् १९९३ देखि १९९७ फ्रान्सका लागि नेपाली राजदूत थिए। ८० वर्षीय उनी श्रीमतीसँग बसिरहेका थिए।
शंकाको घेरामा सानुकान्छा
प्रहरीका अनुसार बाहिरबाट कोही पनि छिरेको प्रमाण भेट्न नसकिएकाले झाको घरभित्रैबाट अनुसन्धान आवश्यक देखिएको छ।
र, किटानी जाहेर पनि आएकाले सानुकान्छा अनुसन्धानमा फेरि तानिएका छन्।
प्रहरी अधिकारीका अनुसार झाको घरमा दुई वटा गेट छन्। जसमध्ये पश्चिम ढोका प्राय: खुल्थ्यो। घटना भएको रात पूर्व र पश्चिमका दुवै ढोका बन्द थिए।
‘बन्द ढोकाबाट भित्र छिरेर कोठैसम्म गई कसले हत्या गर्यो? अनुसन्धान यसैमा केन्द्रित छ,’ एक अनुसन्धान अधिकृतले भने, ‘त्यसकारण भित्रै केही गडबड हुनुपर्छ भन्ने आँकलन हो।’
झाको हत्या हुँदा उनकी श्रीमती सुत्ने कोठाको झ्यालको जाली काटिएको भेटिएको थियो। त्यही झ्यालबाट हत्यारा छिरेको हो कि भन्नेतर्फ अनुसन्धान गर्दा उनकी श्रीमतीले पत्तै नपाएको बयान प्रहरीमा दिएकी छिन्।
‘घरको कुकुर नभुकेको, झ्याल काट्दा श्रीमतीले थाहा नपाएकोजस्ता अनुत्तरित विषय उठेका छन्,’ ती अधिकृतले भने, ‘यसकारण हत्यारा एकदमै चलाख र व्यवसायिक हुनुपर्छ।’
यस्तै, हत्या गर्ने पूर्वयोजना रहेको र त्यसैअनुसार घटना गराइएको प्रहरीको बुझाइ छ।
‘हत्या गर्ने व्यक्तिले घरबाट अन्य कुनै चिज नचलाइकन हत्या गरेकाले मनसाय हत्या मात्रै रहेको बुझ्न सकिन्छ,’ ती अधिकृतले भने।
