कतार एयरवेजको जेटबाट दोहादेखि काठमाडौं आउँदै गरेका एक व्यक्ति लागुऔषध कोकिनसहित पक्राउ परेका छन्। लागुऔषध नियन्त्रण ब्युरोको टोलीले आईभेरिकोष्टका नागरिक मार्सेल गुइहालाई बुधबार विमानस्थलबाट पक्राउ गरेको हो।
ब्युरो प्रमुख डिआइजी दिनेश अमात्यले ३५ वर्षीय मार्सेललाई एक केजी ६०० ग्राम कोकिनसहित पक्राउ गरेको जानकारी दिए। त्रिभुवन विमानस्थल भन्सार कार्यालयको अगाडि उनले ल्याएको नीलो रङको सुटकेस खानतलासी गर्दा कोकिन फेला परेको अमात्यले बताए।
यो परिमाण कोकिनको नेपाली बजार मूल्य झन्डै पाँच करोड पर्छ। मार्सेल नाईजेरियाको लासोस हुँदै कतारको दोहा र त्यहाँबाट काठमाडौं आएको प्रारम्भिक अनुसन्धानमा देखिएकाे प्रहरीले जनाएकाे छ।
उनी काठमाडौंबाट दिल्ली जाने योजनामा थिए। उनीमाथि अनुसन्धान थालिएको ब्युरोले जनाएको छ।
अमात्यका अनुसार नेपालमा कोकिन महंगो पर्ने हुनाले ती विदेशीले दिल्ली छिराउन खोजेका थिए। ‘दिल्ली जान भिसा प्रोसेसिङ मिलाइसकेको बेला पक्राउ गरिएको हो,’ अमात्यले भने।
प्रहरीको भनाइमा उनी भरिया हुन्। कारोबारमा संलग्न अन्य व्यक्तिबारे अनुसन्धान भइरहेको ब्युरोले जनायो।
