जुवा खेलाउन ‘लाइन मिलाइदिनुपर्यो’ भन्दै महानगरीय प्रहरी परिसर भक्तपुरको कार्यालयमा गएका एक व्यक्तिलाई चालीस हजार रकमसहित प्रहरीले पक्राउ गरी अख्तियार दुरुपयोग अनुसन्धान आयोगलाई जिम्मा लगाएको छ।
सिन्धुपाल्चोक चौतारा गाउँपालिका–१ घर भई भक्तपुर नगरपालिका–१ मा बसोबास गरिरहेका ५६ वर्षीय गंगालाल श्रेष्ठलाई बिहीबार परिसर कार्यालयबाटै पक्राउ गरी अख्तियारको टोलीलाई जिम्मा लगाइएको परिसर प्रमुख प्रहरी उपरीक्षक सबिन प्रधानले जानकारी दिए।
प्रधानका अनुसार उनले जुवा खेलाउन पाउँ भन्दै परिसरका प्रहरी निरीक्षक कृष्णप्रसाद विष्टलाई ४० हजार रुपैयाँ दिन खोजेका थिए। श्रेष्ठलाई तुरुन्तै पक्राउ गरी अख्तियार टोलीको जिम्मा लगाइएको प्रहरी उपरीक्षक प्रधानले बताए।
‘भ्रष्टाचार र सामाजिक विकृति रोक्न लागिपरेको प्रहरीको कार्यालयमै पैसा लिएर प्रहरीलाई प्रभावमा पार्न खोजेपछि नियन्त्रणमा लिएर अख्तियारको जिम्मा लगायौं,’ प्रधानले सेतोपाटीसँग भने।
प्रधानका अनुसार श्रेष्ठ लामो समयदेखि भक्तपुर बसी जुवाजन्य गतिविधिमा संलग्न हुँदै आएका छन्। उनलाई केही समयपहिले भक्तपुर परिसरले जुवा खेलाइरहेको बेला पक्राउ गरी मुद्दा चलाएको थियो। अदालतबाट छुटेपछि उनी पुनः जुवाजन्य गतिविधिमा संलग्न हुँदै आएको प्रधानले बताए।