आन्तरिक राजश्व कार्यालय बाराका कम्प्युटर अपरेटर सुदीप लामाविरूद्ध विशेष अदालतमा मुद्दा दायर भएको छ।
प्यान नम्बर बन्द गर्न सहजीकरण तथा राजश्व छुट गरिदिने भन्दै सेवाग्राहीबाट घुस लिएको अभियोगमा पक्राउ परेका लामालाई सोमबार अख्तियार दुरूपयोग अनुसन्धान आयोगले मुद्दा दायर गरेको हो।
अख्तियारका अनुसार लामो समयदेखि कारोबार नभएको प्यान नम्बर बन्द गर्दा राजश्व रकम पनि छुट गरिदिने भनी लामाले सेवाग्राहीबाट चालीस हजार रुपयाँ घुस लिएका थिए।
आयोगको कार्यालय हेटौडास्थित कार्यालयको टोलीले घुसबापतको रकम लिइसकेको अवस्थामा जितपुर-सिमरा उपमहानगरपालिका वडा नं.१, सिमरा बजारमा रहेको किराना पसल अगाडिबाट रंगेहात नियन्त्रणमा लिएको थियो।