डेंगी र स्क्रब टाइफसबाट भरतपुर चितवन मेडिकल कलेजमा तीन र पुरानो मेडिकल कलेजमा एकसहित चार जनाको उपचारका क्रममा मृत्यु भएको छ।
जिल्ला स्वास्थ्य कार्यालय चितवनका किट नियन्त्रक राम केसीका अनुसार पछिल्लो पटक गैंडाकोटका २८ वर्षीया युवतीको स्क्रब टाइफसबाट पुरानो मेडिकल कलेज र अन्य तीन जनाको चितवन मेडिकल कलेजमा मृत्यु भएको हो। जसमध्ये गैंडाकोट स्थायी घर भई नारायणगढ बसोबास गर्ने ७१ वर्षीय वृद्धको डेंगीको कारण मृत्यु भएको हो।
रौतहटबाट उपचारका लागि आएका ३४ वर्षीय पुरुषको स्क्रब टाइफस र शुक्रनगरकी १६ वर्षीया किशोरीको डेंगी र स्क्रब टाइफस सङ्क्रमणको कारण मृत्यु भएको केसीले जानकारी दिए।
दुवै रोगको सङ्क्रमण बढ्दो छ। जिल्लाका अस्पतालमा साउनयता एक हजार ९०८ जनाको डेंगी परीक्षण गर्दा ६२३ जनामा संक्रमण देखिएको केसीले बताए।
जसमध्ये ४५५ जना चितवनका रहेका छन्। यसमध्ये पनि ४१४ जना भरतपुर महानगरपालिकाका रहेको उनको भनाइ थियो।
महानगरमा संक्रमण बढ्दै गएपछि सचेतनाका कार्यक्रमलाई तीव्र पारिएको छ। जसअन्तर्गत गत शनिबार सचेतना र्याली निकालिएको थियो। दैनिक माइकिङ गर्ने, लार्भा खोज र नष्ट गर अभियान सञ्चालन गर्ने जस्ता कार्य वडा तहसम्म भइरहेको महानगरले जनाएको छ।
केसीका अनुसार स्क्रब टाइफसका बिरामीको तथ्यांक संकलन गर्ने काम भइरहेको छ। संक्रमण बढ्दै गएपछि जिल्लाका अधिकांश अस्पताल भरिएका छन्।
