गोरखाको चुमनुब्री गाउँपालिकाले आफ्ना गाउँवासीलाई सेवा सुविधा दिन तिब्बती बजारसँग सहकार्य गर्ने भएको छ।
गत शनिबार चुमनुब्री गाउँपालिका वडा नम्बर १ का अध्यक्ष वीरबहादुर लामा नेतृत्वमा रहेको जनप्रतिनिधि मण्डलले तिब्बतीहरूसँग छलफल गरी औषधि उपचारमा सहजता दिने, विकास निर्माण सघाउने र खाद्यान्नलगायत सामान आयात सहज बनाउने निर्णय गरेको छ।
तिब्बतसँग सीमा जोडिएका गाउँपालिकाका वडा नम्बर १, २, ४ र ५ का बासिन्दाले वडा कार्यालयको सिफारिस लिएर गएपछि तिब्बतका अस्पतालमा उपचार गर्न पाउने निर्णय पनि भएको छ।
‘तिब्बतीहरूसँग तेस्रो पटक बैठक गरेपछि उपचार, सडक निर्माण र नाका सुचारू गर्नेबारे सहमति भएको छ,’ चुमनुब्री गाउँपालिका वडा नम्बर १ सामागाउँका वडा सदस्य मिङमार लामाले सेतोपाटीसँग भने, ‘अझै छलफल आवश्यक छ। हामीले विभिन्न मागहरू राखेका थियौं, सबै पूरा भइसकेको छैन।’
तिब्बत कोङदाङ सहरमा भएको बैठकमा अध्यक्ष लामा, सदस्य मिङमार लामा, वडा नम्बर ५ का अध्यक्ष सोनाम ग्याल्जेन गुरूङ, वडा नम्बर दुई का सदस्यहरू पासाङ छिरिङ र पासाङ डोल्मा, वडा नम्बर ४ का सदस्य रिजिन दोर्जे लामा र प्रहरी चौकी सामागाउँका लालबहादुर केसी र दीपक घर्ती सहभागी थिए।
तिब्बततर्फबाट उपसचिव सरहका कर्मचारी, प्रहरी र सेना उपस्थित थिए।
गोरखा सदरमुकामबाट एक साता पैदल हिडेपछि पुगिने सामागाउँमा स्वास्थ्यको अवस्था नाजुक छ। यहाँ स्वास्थ्य संस्था भए पनि नियमित स्वास्थ्यकर्मी बस्दैनन् भने औषधिको पनि अभाव छ। कोही बिरामी भए दुई लाख रुपैयाँ तिरेर हेलिकप्टर चार्टर गर्नुपर्छ।
सामागाउँमा उत्पादन भएको आलु, फापरलगायतले यहाँका बासिन्दालाई वर्षभर खान पुग्दैन।
उनीहरू एक दिन हिँडेर पुगिने तिब्बतको बजारबाट खाद्यान्नलगायत सामान ल्याउँछन्।
‘अहिले नाका बन्द छ। हामीले नाका खोल्न अनुरोध गरेका थियौं, एक महिनापछि नाका खोलिदिने भनेका छन्,’ लामाले सेतोपाटीसँग भने।
विकास निर्माणमा पनि तिब्बतीहरूले सहयोग गर्ने प्रतिवद्धता बैठकमा भएको उनले जानकारी दिए।
‘अहिले एउटा डोजर सहयोग गर्छु भनेका छन्। बाटो बनाउन सजिलो हुन्छ,’ उनले भने, ‘रूई नाका नजिकै ट्रेकिङ हाउस बन्दैछ। त्यो बनेपछि सामानहरू ल्याउन पनि सजिलो हुन्छ।’
तिब्बतीहरूले नेपालतर्फ सीमामा प्रहरी चौकी राख्न पहल गरिदिन पनि आग्रह गरेका थिए।
