बाँके जिल्ला सभापतिमाथि नेकपा कार्यकर्ताबाट भएको आक्रमणको विरोध गर्दै नेपाली कांग्रेसले माइतीघरमण्डलामा प्रदर्शनसहितका कार्यक्रम सार्वजनिक गरेको छ।
शुक्रबार केन्द्रीय कार्यालय सानेपामा पत्रकार सम्मेलन गर्दै कांग्रेसले बाँके सभापति आक्रमणको बिरोधमा शनिबार माइतीघरमण्डलामा धर्नामा बस्ने कार्यक्रम सार्वजनिक गरेको हो।
प्रवक्ता विश्वप्रकाश शर्माका अनुसार शनिबार ८ बजे गृहमन्त्रीलाई ज्ञापन पत्र बुझाउने र दिउँसो धर्नामा बस्ने कार्यक्रम तय भएको हो। ‘कार्यक्रमको नेतृत्व काठमाडौं, भक्तपुर र लतितपुरका जिल्ला सभापतिले गर्नुहुनेछ,’ शर्माले भने।
कांग्रेसले बाँके जिल्ला सभापतिमाथि आक्रमण गर्ने नेकपा कार्यकर्तालाई कारबाही गर्न माग गरेको छ। ‘कार्यक्रम भइरहेको ठाउँमा गएर यहाँ कार्यक्रम नगर, यो हाम्रो ठाउँ हो भनी आक्रमण गर्ने नेकपाको अराजक गतिविधिको हामी बिरोध गर्छौं,’ प्रवक्ता शर्माले भने, ‘तत्काल दोषी पत्ता लगाएर कारबाही नगरे अन्य संघर्षका कार्यक्रम गर्न बाध्य हुन्छौं।’
बाँके खजुरा गाउँपालिका २ सीतापुरमा बिहीबार भएको दोस्रो चरणको जागरण अभियानका क्रममा कांग्रेस जिल्ला सभापति किरण कोइरालालाई आक्रमण गरी घाइते बनाएको घटनामा प्रहरीले तीन जना नेपाल कम्युनिष्ट पार्टीका कार्यकर्तालाई पक्राउ गरेको छ।
पीडितको जाहेरी परेपछि नेकपा स्थानीय नेता लोकबहादुर शाही, निर्मल खत्री र रोशनसिंह ठकुरीले प्रहरीले बिहीबार राति पक्राउ गरेको हो।
बिहीबार दिउँसो रेडक्रसको हलमा कार्यक्रम भइराखेको बेला कार्यक्रम गर्न नदिने भन्दै नेकपा कार्यकर्ताले आक्रमण गर्दा कोइरालाको हात भाँचिएको थियो।
बाँकेमा नेपाली कांग्रेसको जागरण अभियानका क्रममा बिहीबार सत्तारुढ दल नेपाल कम्युष्टि पार्टी (नेकपा)का कार्यकर्ताले आक्रमण गरेका थिए। आक्रमणबाट नेपाली कांग्रेस बाँकेकी सभापति किरण कोइराला घाइते भएकी थिइन्।
उनको बायाँ हात भाँचिएको छ। किरण पूर्वप्रधानमन्त्री स्व. सुशील कोइरालाकी बुहारी हुन्।
बिहीबार दिउँसो खजुरा गाउँपालिका वडा नं. २ सितापुरमा आयोजित जागरण अभियानमा प्रवेश गरी नेकपाका कार्यकर्ताले अन्धाधुन्द आक्रमण गर्दा अन्य आधा दर्जन जति कांग्रेसका कार्यकर्ता घाइते भएका थिए।
दिउँसो करिब १ बजेतिर केन्द्रीय प्रतिनिधि विद्याप्रसाद खनालले सम्बोधन गरिरहेको समयमा हलभित्रै प्रवेश गरेर नेकपाका चार–पाँच जना कार्यकर्ताले अन्धाधुन्द कुटपिट गरको सभापति कोइरालाले सेतोपाटीलाई बताइन्।
‘म बोलेर बसेको केही बेरपछि केन्द्रीय प्रतिनिधि बोल्दै गर्दा उनीहरू दुई वटा ढोकाबाट भित्र पसेर माइक फालिदिए,उहाँलाई धक्काए र अरूमाथि पनि धमाधम कुटपिट गरे,’ सभापति कोइराले भनिन्, ‘मैले यसो नगर्नुस् तपाईंहरूका जे कुरा छन् हाम्रो कार्यक्रम सकेर छलफल गरौंला भन्दा एक जनाले मलाई नै हिर्काए। बायाँ हात नै भाँचियो।’
सभापति कोइरालाले कार्यक्रम बिथोल्ने उद्देश्यले खजुरा गाउँपालिका वडा नं. १ का वडा अध्यक्ष सुमन मल्लको निर्देशनमा आक्रमण भएको दाबी गरिन्।
आक्रमण हुनुको खास कारण थाहा नभए पनि सडकमा भएको अनियमितताबारे जागरण अभियानमा स्थानीय नेताहरूले त्यो कुरा उठाएपछि वडा अध्यक्षको निर्देशनमा आक्रमण भएको उनको दाबी छ।
‘उनीहरू पूर्वयोजनासहित कार्यक्रममा आक्रमण गर्न गएका रहेछन् तर हामीलाई त्यो कुरा थाहा नै भएन,’ सभापति कोइरालाले भनिन्, ‘चार–पाँच जना हलभित्रै प्रवेश गरेर आक्रमण गरेका थिए भने अन्य सात जनाजति बाहिर उनीहरूलाई पहरा दिइरहेका थिए।’