भदौको तेस्रो र चौथो साता अत्यधिक देखिएको डेङ्गी रोगको सङ्क्रमण घटेको छ। साउन पहिलो साताबाट क्रमशः बढ्दै गएको डेङ्गी रोगको सङ्क्रमण पछिल्लो एक साता दैनिक रुपमा घट्दै आएको चिकित्सकले जनाएका छन्।
भरतपुर अस्पतालका सूचना अधिकारी लीलाधर पौडेलका अनुसार गत भदौ २२ गते एकै दिन एक हजार नौ सय २२ जना बहिरंग सेवामा आएकामध्ये नौ सय मेडिकल विभागमा रहेकामा धेरैलाई डेङ्गी सङ्क्रमण देखिएको थियो। सोही दिन अघिल्ला दिनहरुका तीन सय बिरामीले पुनः मेडिकल बहिरङ्ग सेवामा स्वास्थ्य परीक्षण गराएका थिए।
मेडिकल विभागका प्रमुख डा.प्रकाश खतिवडाका अनुसार त्यस दिन एक हजार दुई सय ३० जना बिरामी हेरिएको थियो। त्यसपछिका दिनहरुमा क्रमशः बिरामी घट्दै गएको उनले जानकारी दिए। बिहीबार अस्पतालको बहिरंग सेवामा एक हजार तीन सय बिरामी आएकामध्ये पाँच सय हाराहारी मात्रै मेडिकल वार्डमा आएका थिए। तिनीहरुमध्ये तीन सय जतिलाई ज्वरोको सङ्क्रमण रहेकामा केहीलाई मात्र डेङ्गीको सङ्क्रमण देखिएको डा. खतिवडाले बताए।
भदौ चौथो सातापछि क्रमशः सङ्क्रमितको सङ्ख्या घट्दै गएको केसीले बताए। पछिल्ला दिनहरुमा सङ्क्रमण भएका बिरामी घटेको भन्दै उनले वर्षा बन्द भएसँगै आइतबार र सोमबार हेरेर सङ्क्रमण दर भन्न सकिने बताए। आगामी कात्तिकसम्म डेङ्गीको सङ्क्रमण देखिने उनले बताए।
अस्पतालका वरिष्ठ फिजिसियन डा. भोजराज अधिकारीले भर्ना भएका एक सय जना बिरामीमध्ये ६० जना ज्वरोका हुन् र तिनीहरुमध्ये ६० प्रतिशतसम्म डेङ्गीका हुने गरेकामा अहिले घटेर १५ देखि २० प्रतिशतमा झरेको बताए। यद्यपि मौसमी ज्वरो भने रहिरहेको उनको भनाइ छ।
लगातार परेको वर्षाले तापक्रम घटेका कारण डेङ्गीको सङ्क्रमण पनि घट्ने अपेक्षा गरिएको छ। स्वास्थ्य कार्यालय चितवनका कीट नियन्त्रक राम केसीका अनुसार साउन यता बिहीबारसम्ममा जिल्लामा बिरामीको सङ्ख्या दुई हजार पाँच सय १५ जना पुगेको छ। आठ हजार दुऐ सय २१ जनाको रक्त परीक्षणका क्रममा सो सङ्ख्यामा सङ्क्रमित भेटिएका हुन्। रासस