गृहमन्त्री रामबहादुर थापाले दसैं, तिहार र छठजस्ता चाडपर्वमा विगतका वर्षहरुमा भन्दा पनि शान्ति, सुरक्षाको अवस्था सुदृढ बनाउने प्रतिवद्धता व्यक्त गरेका छन्।
गृहमन्त्री थापाले सबैभन्दा बढी आवातजावत हुने समय भएकाले दसैं, तिहार जस्ता चाडपर्वलाई ध्यानमा राखेर सरकारले असोज र कात्तिक महिनाका लागि विशेष सुरक्षा योजना नै तय गरेकाे जानकारी दिए।
सोमबार संघीय संसदको राज्य व्यवस्था तथा सुशासन समितिको बैठकमा बोल्दै उनले सर्वसाधारणको यात्रा सुरक्षित बनाउन तथा शान्ति सुरक्षा कायम गर्न सरकारले आवश्यक तयारी गरिरहेको बताए। उनले चाडपर्वमा हुने महिला हिंसा नियन्त्रण गर्न सादा पोशाकमा प्रहरी परिचालन गरिएको पनि बताए।
गृहमन्त्री थापाले सुरक्षित यात्राका लागि राजमार्गहरुमै सहायता कक्षको स्थापना, बस टिकटमा कालोबजारी र कृत्रिम अभाव हुन नदिन तथा सडक दुर्घटना भइहालेमा तत्काल मेडिकल टिमको परिचालन गर्ने योजना तय गरिएको समितिलाई जानकारी दिए। त्यसैगरी सरकारले भारतबाट दसैं मान्न घर फर्किएका नागरिकहरुको सहयताका लागि सीमा क्षेत्रमा पनि नागरिक सहायता कक्ष स्थापना गर्न लागिएको जनाएको छ।
बैठकमा गृहसचिव प्रेमकुमार राईले २ हजार, १ हजार र ५ सय दरका भारतीय नोट नचल्ने भएकाले त्यसलाई नलिन पनि सबै नागरिकलाई सचेत गराए। नेपालमा प्रतिबन्ध लगाइएकाले ती भारतीय नोट प्रयोगमा नआउने भन्दै उनले त्यस्ता नोट नलिन आग्रह गरे।
बैठकमा समितिका सदस्यहरुले दसैंको टिकट बुकिङको कामलाई व्यवस्थित बनाउन पनि सरकारलाई सचेत गराए। समितिका सदस्य दिलेन्द्रप्रसाद बडुले वृद्ध, असक्त नागरिकहरुलाई दसैंको टिकट लिन छुट्टै लाईनको व्यवस्था गर्न सरकारको ध्यानाकर्षण गराए।
समितिका अर्का सदस्य महेश्वरजंग गहतराज अथकले चाडबाडका बेला अपराधिक घटना बढने हुनाले त्यस्ता घटना हुन नदिने गरी आवश्यक सुरक्षाको योजना बनाउन सरकारसँग माग गरे।
समितिका सदस्यहरुले दसैंमा सवारी साधनको उचित व्यवस्था गर्न सरकारको ध्यानाकर्षण गराए।
