काठमाडौँ उपत्यकाको पूर्वी उत्तरी क्षेत्र गोकर्णेश्वरको शिवपुरी राष्ट्रिय निकुञ्जमा एक हजार किलोको अष्टधातुको बाघको मूर्ति निर्माण गरिने भएको छ ।
नेपाल पर्यटन वर्ष, २०२० लाई लक्ष्य गरी गोकर्णेश्वर नगरपालिका–१ सुन्दरीजल उख्रेनी देउरालीस्थित बागद्वारमा बाघको मूर्ति निर्माण गर्न लागिएको हो ।
प्रदेश नं ३ भौतिक पूर्वाधार विकास कार्यक्रमअन्तर्गत विनियोजित १० लाख रूपैयाँ तथा स्थानीयवासीले प्रदान गरेको धातुबाट बाघको मूर्ति निर्माण गर्न लागिएको प्रदेशसभा सदस्य रामेश्वर फुँयालले बताए । उक्त मूर्तिको आगामी २०७७ वैशाख १ गते उद्घाटन गरिने उनले बताएका छन् ।
सो ठाउँमा डमरुको मूर्तिसमेत निर्माण गरिनेछ । मूर्ति निर्माणका लागि फुँयालको नेतृत्वमा धातु सङ्कलन अभियान सञ्चालन गरिएको छ ।
'हालसम्म सात सय किलो धातु सङ्कलन भएको छ', सांसद फुँयालले भने, 'वाग्मतीको उद्गमस्थल बागद्वारमा मूर्ति निर्माण गरी आन्तरिक तथा बाह्य पर्यटक भित्र्याउने लक्ष्य छ।'
(रासस)
