गैरआवासीय नेपाली संघको चुनावमा सहभागी हुन अस्ट्रेलियाबाट आएका प्रतिनिधि रमेश थापालाई अध्यागमन विभागले पचास हजार रुपैयाँ जरिवाना तिराएको छ।
अध्यागमन विभागको डेस्क तोडफोड गरेको अभियोगमा पक्राउ परेका उनलाई मंगलबार साँझ पचास हजार रुपैयाँ जरिवाना तिराइएको विभागले जनाएको छ।
एनआरएनको नवौं अन्तर्राष्ट्रिय सम्मेलनमा सहभागी हुन अस्ट्रेलियाबाट पाँच प्रतिनिधिमध्ये थापाले अध्यागमन विभागमा आवश्यक प्रक्रिया पूरा गर्ने क्रममा विलम्ब भएको भन्दै डेस्कको सिसा फुटाएका थिए।
आइतबार राति क्याथेक ड्रागन एयरलाइन्सबाट काठमाडौं आएका थापालाई पक्राउ गरिएको थियो।
विभागका महानिर्देशक ईश्वरराज पौडेलका अनुसार तोडफोडबाट अध्यागमन डेस्कको सिसा फुटेको थियो।
थापासमेत पाँच जना गैरआवासीय नेपाली आएकामा थापालाई विभागले पक्राउ गरेको हो।
उनलाई अध्यागमनकै हिरासतमा राखेर अनुसन्धान थालिएकोमा मंगलबार जरिवाना तिराएर छाडिएको पौडेलले जानकारी दिए।