लामो समयदेखि क्यानडा र अमेरिकाबाट नेपालमा लागुऔषध गाँजा र चरेश भित्र्याउने कारोबारीलाई प्रहरीले पक्राउ गरेको छ।
लागुऔषध नियन्त्रण ब्युरोको टोलीले दुई दिनमा तीन जना कारोबारी, सात किलो चरेश र साढे ६ किलो गाँजा समातेको हो।
उक्त चरेश र गाँजा साउन्ड सिस्टमभित्र राखेर ल्याइएको भेटिएको ब्युरोले जनाएको छ।
कारोबारी पक्राउसँगै क्यानडा र अमेरिकाबाट नेपालमा लागुऔषध भित्रिने गरेको नयाँ तथ्य पनि फेला परेको ब्युरोका प्रहरी नायब महानिरीक्षक दिनेश अमात्यले बताए।
उनका अनुसार कात्तिक ४ गते काभ्रेपलाञ्चोक पाँचखाल नगरपालिका-१० का अचुत त्रिपाठीलाई पक्राउ गरिएको थियो।
काठमाडौं गैरीगाउँस्थित डिलाइट होटलमा जाँदै गरेका उनलाई साउन्ड सिस्टमसहित प्रहरीले पक्राउ गरेको थियो।
अडिओ सिस्टम चेकजाँच गर्दा त्यहाँभित्र एक किलो छ सय ग्राम गाँजा फेला परेको अमात्यले बताए।
उक्त गाँजा क्यानडाबाट ल्याइएको अनुसन्धानमा खुलेको छ।
सो गाँजा फ्लाई दुबईको कार्गो जहाजबाट नेपाल ल्याइएको थियो। त्यसपछि प्रहरी काठमाडौं-९ को गैरीगाउँस्थित उक्त होटल पुगेको थियो। होटलमा चेकजाँच गर्दा साउन्ड सिस्टमभित्र तीन सात किलो चरेश र तीन किलो गाँजा भेटिएको थियो।
होटलमा चरेश र गाँजा भेटिएपछि होटल सञ्चालक राजेन्द्रप्रसाद पाण्डेलाई प्रहरीले कात्तिक ५ गते पक्राउ गरिएको ब्युरोले जनाएको छ। उनी पक्राउ परेपछि अर्का कारोबारी सुरेन्द्र पाण्डेलाई पोखरा लेकसाइडबाट प्रहरीले पक्राउ गरेको थियो।
उनी बुधबार पक्राउ परेका हुन्। फ्लाई दुबईकै कार्गो विमानबाट उनको नाममा अमेरिकाबाट पठाइएको साउन्ड सिस्टमभित्र दुई किलो गाँजा फेला परेको थियो।
त्रिभुवन अन्तर्राष्ट्रिय विमानस्थलको कार्गो कम्प्लेक्समा उक्त साउन्ड सिस्टम फेला परेको थियो। त्यसभित्र दुई किलो गाँजा फेला परेपछि प्रहरीले पोखरा पुगेका सुरेन्द्रलाई पक्राउ गरेको हो।
डिआइजी अमात्यका अनुसार पाण्डेद्वय लामो समयदेखि अमेरिका र क्यानडाबाट नेपालमा लागुऔषध भित्र्याउने कारोबारी रहेको पत्ता लागेको छ।
पक्राउ परेकालाई लागुऔषध नियन्त्रण ऐन २०३३ अनुसार अनुसन्धान तथा कारबाही थालिएको अमात्यले बताए।
