‘अघोरी बाबा’ भनेर चिनिने विजय केसीसँग हालसालै बिहे गरेकी शारदा पाण्डेलाई प्रहरीले हिरासतमा लिएको छ। चितवनकी एक युवतीले ठगी गरेको जाहेरीका आधारमा सोधपुछ गर्न बोलाएको प्रहरीले उनलाई सोमबार हिरासतमा लिएको हो।
महानगरीय प्रहरी बृत्त बौद्धमा पाण्डे सोमबार बिहान पुगेकी थिइन्। पूर्वपति गोविन्द अधिकारीसँग बिहे गराउँदा भएको सम्झौता कार्यान्वयन नभएपछि ती युवतीले पाण्डेविरुद्ध उजुरी गरेकी थिइन्।
प्रहरीका अनुसार आफूलाई अमेरिका पठाउने भनी आफ्ना पूर्वपतिसँग पाण्डेले बिहे गराई पैसा लिएर पनि अमेरिका नलगेपछि युवतीले प्रहरीमा जाहेरी दिएकी थिइन्।
महानगरीय प्रहरी बृत्त बौद्ध प्रहरी वृत्तका प्रहरी नायब उपरीक्षक रमेश सिंहका अनुसार युवतीमाथि ठगी गरेको देखिएकाले पाण्डेलाई हिरासतमा लिइएको हो।
सोमबार दुवै पक्षबीच छलफल भए पनि पाण्डेले ठगी गरेको आधार पर्याप्त देखिएकाले हिरासत लिनुपरेको सिंहले बताए। ‘उहाँलाई मंगलबार हिरासतमा बस्ने थप म्याद लिएर अनुसन्धान थालिन्छ,’ सिंहले भने।
पाण्डेले बुढानिलकण्ठ मन्दिरमा ती युवती र अधिकारीबीच विवाह गराएको प्रमाण पनि प्रहरीले फेला पारेको डिएसपी सिंहले बताए।
