पर्सा, काभ्रे, सुनसरी र दाङमा भएका छुट्टाछुट्टै सवारी दुर्घटनामा चार जनाको मृत्यु भएको प्रहरीले जनाएको छ।
पर्सा:
धोबिनी गाउँपालिका-२ आशवारीस्थित नहरमा ना२१प १५७९ नम्बरको मोटरसाइकल अनियन्त्रित भई मंगलबार बिहान दुर्घटना हुँदा गम्भीर घाइते भएका मोटरसाइकल चालक सोही गाउँपालिका-४ बस्ने ४५ वर्षीय अशोकप्रसाद साहको नारायणी अस्पतालतर्फ उपचारको लागि लैजाने क्रममा बाटोमै मृत्यु भएको छ।
दुर्घटनामा गम्भीर घाइते भएकी मोटरसाइकलमा सवार साहकी बहिनी भारत बस्ने ४२ वर्षीया सुनैना देवीको नारायणी अस्पतालमा उपचार भइरहेको छ।
काभ्रे:
बनेपा नगरपालिका-१० जनगालस्थित सडकमा मंगलबार बिहान बा १० च २१५४ नम्बरको बोलेरो गाडीले अनटेष्ट मोटरसाइकललाई ठक्कर दिँदा उक्त मोटरसाइकल बा३ख ७०७८ नम्बरको टिपरको मुनि छिर्न गई भएको दुर्घटनामा मोटरसाइकलमा सवार भक्तपुर, भक्तपुर नगरपालिका-९ च्यामासिङ्ग बस्ने २० वर्षीय विमल कुटुजुको घटनास्थलमै मृत्यु भएको छ।
दुर्घटनामा घाइते भएका मोटरसाइकल चालक भक्तपुर चाँगुनारायण नगरपालिका-८ बस्ने २१ वर्षीय प्रेम बहादुर दाहाललाई शिर मेमोरियल अस्पताल बनेपा हुँदै थप उपचारको लागि मध्यपुर ठिमी भक्तपुरतर्फ पठाइएको छ।
सुनसरी:
कोसी गाउँपालिका-४ पूर्वपश्चिम राजमार्गमा स १ झ २६८ नम्बरको गाडी र को ३० प ५३०१ नम्बरको मोटरसाइकल एक-आपसमा ठक्कर मंगलबार बिहान दुर्घटना हुँदा गम्भीर घाइते भएका मोटरसाइकल सवार सोही ठाउँ पृथ्वीनगर बस्ने २९ वर्षीय दिपेश मुखिया सुनुवारको जिल्ला अस्पताल इनरूवामा उपचारको क्रममा मृत्यु भएको छ।
दुर्घटनामा घाइते भएका मोटरसाइकल चालक झापा दमक नगरपालिका-१० बस्ने ३० वर्षीय योगेशकुमार धिमाललाई उपचारको लागि विराटनगर नर्सिंङ होममा पठाइएको छ।
दाङ:
लमही नगरपालिका-५ सुनखोलीमा लु २ ख १३७६ नम्बरको ट्रकले मंगलबार बिहान ठक्कर दिँदा गम्भीर घाइते भएका पैदलयात्री सोही नगरपालिका-४ अर्ना बस्ने ३५ वर्षीय रफिक राइनीको नेपालगञ्ज नर्सिङ होममा उपचारको क्रममा मृत्यु भएको छ।
ट्रक चालकलाई प्रहरीले नियन्त्रणमा लिएको छ।
