काठमाडौंमा 'कपडा बैंक' मार्फत् प्रयोग भइसकेका लुगा सित्तैमा वितरण गर्दै आएको हन्ड्रेड्स ग्रुपले बढी भएका कपडा दुर्गममा पठाउन थालेको छ।
पछिल्लो समय धेरै कपडा थुप्रिएकाले दुर्गममा पठाउँदा उचित व्यस्थापनका साथै ग्रामिण भेगका मान्छे लाभान्वित हुने सोचेर यो काम थालेको ग्रुपका संयोजक विमल पन्तले जानकारी दिए।
'अनामनगरलगायत अन्य ठाउँमा जम्मा भएको कपडा खपत हुन पनि गाह्रो भयो,' विमलले भने, 'चिसो मौसम सुरू भइसक्यो। यहाँ थुप्रिएका लुगा पक्कै अन्त काम लाग्ला सोचेर हामी दुर्गम गएका हौं।'
ग्रुपका सदस्यहरू नै मिलेर निजी खर्चमा दुर्गमसम्म पुगेर लुगा सित्तैमा वितरण गरिएको हो।
'हामी जुम्ला, हुम्ला, कालिकोट, धादिङतिर लुगा बोकेर घुम्दैफिर्दै हिँड्यौं। जहाँ आवश्यक देखियो त्यहाँ दियौं,' उनले भने, 'यसरी लुगा बाँड्न हिँडेको भन्दा बाटो हिँड्ने स्थानीयहरूले नै पनि बोकेर सघाइदिनुभयो।'
जुम्लामा लुगा पुर्याउँदै। तस्बिर सौजन्यः बब्लु गुप्ता ग्रुपले गत साउनदेखि पुराना कपडा संकलन र वितरणका लागि 'कपडा बैंक' स्थापना गरेको हो। बैंकमा जम्मा भएको कपडा, जुत्ता, झोला आदि गरिब तथा विपन्नलाई वितरण गर्दै आएको छ। जो कोहीले पनि कपडा दान गर्न सक्ने यो अभियानले हत्तपत्त नयाँ लुगा किन्न नसक्नेलाई धेरैहदसम्म राहत दिएको विमल सुनाउँछन्।
'मान्छेदाई कपासको कति आवश्यक रहेछ, त्यो हामीले दुर्गम पुगेपछि मात्र थाहा पायौं,' उनले भने 'जोसँग जति कपडा छन् हामीलाई दिनुहोस्, हामी त्यसको सही व्यवस्थापन गर्नेछौं।'
अब छिट्टै चितवन र मकवानपुर आसपासका चेपाङ बस्तीमा कपडा लैजाने तयारी भइरहेको पनि उनले जानकारी दिए। मौसमअनुसार कपडा वितरण गर्दै आएको ग्रुपलाई अहिले देश-विदेशबाट उत्तिकै साथ र सहयोग मिलिरहेको विमल बताउँछन्।
एकैपटक धेरै कपडा आउँदा प्रयोगयोग्य र सफा मात्रै आएका छैनन्। ढुसी परेका र मैला लुगा पनि मिसिएर आएको बताउँछन् समूहका अर्का सदस्य बब्लु गुप्ता। यो समस्या समाधान गर्न समूह अहिले लुगा धुने मेसिन किन्ने योजनामा छ।
'धेरै ठाउँबाट कपडा सहयोग आइरहेको छ। तर अब केही आर्थिक सहयोग पनि आए हामीलाई परिचालन हुन सजिलो हुन्थ्यो,' गुप्ताले भने, 'फोहोर र मैला कपडा दिन अप्ठ्यारो हुन्छ। हातैले धुन सम्भव छैन। त्यसैले वासिङ मेसिन किन्ने योजनामा छौं।'
काठमाडौंको अनामनगरबाट सुरू भएको कपडा बैंक अहिले देशका विभिन्न ठाउँमा विस्तार भएको छ। प्रयोग गर्न योग्य कपडा, जुत्ता, चप्पल, सिरक, डसना, झोला, टोपी लगायत सामान दिन इच्छुकले कपडा बैंकलाई खबर गर्न सक्छन्। अवथा नजिकको कपडा बैंकमा लगेर राखिदिन पनि सक्छन्।
जुम्लामा लुगा पुर्याउँदै। तस्बिर सौजन्यः बब्लु गुप्ता 
जुम्लामा लुगा पुर्याउँदै। तस्बिर सौजन्यः बब्लु गुप्ता 
