विद्यार्थीहरूले तालाबन्दी गरेकै अवस्थामा रुपन्देहीको भैरहवास्थित युनिभर्सल कलेज अफ मेडिकल साइन्सेज शिक्षण अस्पतालले महत्वपूर्ण कागजपत्रको फाइल नै ‘गायब’ पारेको छ।
सरकारले विद्यार्थीबाट अवैधानिकरूपमा असुल गरेको शुल्क छानबिन गर्न कलेजमा छापा मार्ने डरले अस्पतालले कागजपत्र नै ‘गायब’ पारेको विद्यार्थीहरूले आरोप लगाएका छन्।
कलेजमा बिडिएस र एमबिबिएस अध्ययनरत विद्यार्थीहरू पछिल्लो तीन हप्तादेखि आन्दोलित छन्।
गत सोमबार कलेज प्रशासन, लेखा, प्राध्यापक तथा सहायक प्राध्यापक कक्षलगायतमा तालाबन्दी गरेका थिए।
तर मेडिकल कलेज प्रशासनले झ्यालबाट भित्र पसेर महत्वपूर्ण फाइल नै लुकाउने काम गरेको पाइएको छ।
आन्दोलनरत विद्यार्थीका अनुसार कलेज प्रशासन शाखामा एउटै ढोकाभित्र छुट्टाछुट्टै क्याबिन रहेका छन्।
ती क्याबिनमा विद्यार्थीबाट अवैधरूपमा लिइएको शुल्कको कागजात राखिएको थियो।
कलेज प्रशासन शाखामा मंगलबार विद्यार्थी गएर हेर्दा झ्यालको लक नतोडिएकोमा १० बजेपछि जाँदा सबै झ्यालका लक तोडेर भित्रका सबै कागजात नै ‘गायब’ पारिएको थियो।
बन्द कोठाभित्र कम्प्युटर खोलिएकै अवस्थामा राखिएको थियो। विद्यार्थीहरूको आन्दोलन लम्बिँदै जाँदा भैरहवा मर्निङ वाक ग्रुपले पनि आन्दोलनप्रति ऐक्यवद्धता जनाएको छ।
ग्रुपका अध्यक्ष ओमकार गौचनले मेडिकल कलेजहरूले विद्यार्थीहरूसँग लिएको सम्झौताभन्दा बढी शुल्क फिर्ता गर्नुपर्ने र अनियमिततालाई रोक्नुपर्ने बताए।
सम्पत्ति शुद्धीकरण अनुसन्धान विभागले चितवन मेडिकल कलेज, नेसनल मेडिकल कलेज, वीरगञ्ज र नोबल मेडिकल कलेजमा आइतबार छापा मारेपछि युसिएमएस प्रशासनले पनि महत्वपूर्ण फाइल गायब पारेको विद्यार्थीहरूले दाबी गरेका छन्।
कलेजका विद्यार्थी अशोक पाण्डेले कलेज प्रशासनले डरधम्की दिने गरेको र त्यसैले पनि विद्यार्थीहरू बढी शुल्क तिर्नुपरे पनि खुलेर बोल्न डराउने गरेको बताए।
सरकारले बिडिएसका लागि १९ लाख ३२ हजार रुपैयाँ र एमबिबिएसका लागि ४२ लाख ५० हजार रुपैयाँ शुल्क तोके पनि युसिएमएससहित अन्य मेडिकल कलेजले त्यसबाहेक १० लाखसम्म अतिरिक्त शुल्क उठाउँदै आएको विद्यार्थीको दाबी छ।
यता, मेडिकल कलेजका प्रबन्धक कमलप्रसाद ढकालले कलेजबाट कुनै पनि फाइल गायब नपारिएको दाबी गरे। उनले कलेज प्रशासनमा विद्यार्थीहरूले ताला लगाएको अवस्थामा फाइल गायब भयो भनेर लगाएको आरोप झूटो रहेको बताए।
विद्यार्थीहरूले भने प्रशासनको भनाइ मान्न तयार छैनन्। प्रशासनले भर्नासम्बन्धी सम्पूर्ण कागजात लुकाएको दाबी गरेका छन्।
