केही दिनअघि मात्र गुगलका सिइओ सुन्दर पिचाई गुगलकै अभिभावक कम्पनी अल्फाबेट इंकका पनि सिइओ बने। सिइओ बनेसँगै भारतीय मूलका पिचाईले संसारकै दोश्रो ठूलो कम्पनी अल्फाबेट र यसको बजारको भविष्यबारेमा आफ्ना योजना सुनाएका छन्।
उनका भनाइ उद्धृत गर्दै भारतीय सञ्चारमाध्यम दैनिक भाष्करले लेखेको छ-
संसारभरबाट मलाई शुभकामना दिनेहरूलाई धेरै धन्यवाद। यो उत्साहका निम्चि म मिडियाका माध्यमबाट सबै भारतीय पाठकलाई धेरै धन्यवाद दिन चाहन्छु। यो क्षण मेरो लागि साँच्चै सुखद छ।
तपाईंहरूलाई थाहै छ, म नयाँ भूमिकातिर अघि बढिरहेको छु। यो पनि भन्न चाहन्छु यसबाट हाम्रो कामको गतिशिलता बदलिने छैन। म यसअघि जस्तै काम गरिरहन्छु। अब अल्फाबेट ग्रुपको होल्डिंग्स र लगानीको अतिरिक्त जिम्मेवारी ममाथि हुनेछ।
यो नयाँ परिवर्तन गुगलका सह-संस्थापक ल्यारी पेज र सर्जेइ ब्रिनको निःस्वार्थ सहयोग विना सम्भव हुन्थेन। उनीहरू अहिले मूलधारको व्यवस्थापनमा आफ्नो भूमिका देखाउन चाहँदैनन्। मलाई नै एक किसिमले आफ्नो उत्तराधिकारी मान्छन्।
उनीहरू बोर्ड सदस्यका रूपमा हाम्रो एक अभिन्न अंग बनिरहेका छन्। योभन्दा धेरै मेरो व्यक्तिगत साथी र संरक्षकका रुपमा पनि।
तर अब अल्फाबेट पूर्ण रूपमा कम्पनीहरूको विकसित छाता बनेको छ। म हाम्रा सबै प्रविधि कम्पनीमा आफ्नो भूमिका बराबर गर्नतिर जोड दिनेछु। नयाँ प्रविधिलाई हाम्रो मुख्य कारोबारमा एकीकृत गरेर एकसाथ अगाडि बढाउने मेरो मुख्य कामको एक भाग हुनेछ।
यद्यपी यो समयमा म गुगलका लागि जे गरिरहेको छु त्यो पनि गरिरहन्छु। साथै पहिले जस्तै नाफा आर्जन गर्न ध्यान दिनेछु। हामी सधैं झैं भारतीय बजारमा आफ्नो कदम अगाडि बढाइरहन्छौं। यसपटक गुगल र यसको सेवाबाहेक भारतमा अल्फाबेट कम्पनी ल्याउन हाम्रो ध्यान ज्यादा हुनेछ। यसबाट धेरै रोजगारी अवसर हुनेछ। हामी चाँडै योजना तयार गर्नेछौं।
म आफ्नो क्षमताअनुसार आफ्नो उत्कृष्ट प्रदर्शन गर्नेछु।