भारतको उत्तरप्रदेशमा बलात्कारका विरूद्ध रायबरेलीस्थित अदालतमा बयान दिन जान लाग्दा ज्युँदै जलाइएकी एक महिलाको उपचारको क्रममा मृत्यु भएको छ।
उत्तरप्रदेशको उन्नाओ जिल्ला सिन्दुपुर गाउँकी २० वर्षीय ती महिला बिहीबार अदालतमा बयान दिन जान रेल स्टेशन पुग्न लागेको बेला केही मानिसले कब्जामा लिई नजिकैको खेतमा लगेर उनलाई आगो लगाएका थिए।
ती महिलालाई गाउँ बाहिर लगी खेतमा पेट्रोल छर्केर जलाइएको थियो। शरीरमा आगो लागेकी ती महिला हारगुहार गर्दै नजिकैको गाउँ पुगेकी थिइन्।
शरीरका ९० प्रतिशत भाग जलेकी महिलालाई उपचारका लागि दिल्लीस्थित अस्पताल लगिएको थियो। उपचारको क्रममा शुक्रबार राती उनको मृत्यु भएको बिबिसी हिन्दीले उल्लेख गरेको छ।
मृत्यु हुनुअघि ती महिलाले आफ्ना दाजुसँग आफूमाथि आगो लगाउनेहरूलाई फाँसीमा झुण्डाएको हेर्ने इच्छा रहेको बताएकी थिइन्।
‘दाइ मलाई बचाउनुस् म मर्न चाहन्नँ,’ उनले दाइसँग भनेकी थिइन्, ‘जसले मलाई यो स्थितिमा पुर्याए, म तिनीहरूलाई फाँसी दिएको हेर्न चाहन्छु।’
गत वर्ष डिसेम्बरमा बलात्कारको घटना भएको र त्यसको तीन महिनापछि ती महिलाले प्रहरीमा उजुरी दिएकी थिइन्।
उनीमाथि पाँच व्यक्तिले बलात्कार गरेका थिए। बलात्कारी पाँचमध्ये तीन जनालाई पक्रिएर प्रहरीले हिरासतमा राखेको छ।
दुई जना भने फरार छन्।
ती महिलामाथि बलात्कार गर्नेहरूले नै अहिले हमला र आगो लगाएको आशंका गरिएको छ।
यो घटनाले भारतभरि आक्रोश फैलिएको छ।
केहीदिन अघि मात्र भारतको हैदरावाद सहरमा स्कुटर बिग्रेर सडकमा उभिइरहेकी भेटेरेनरी डाक्टरको बलत्कारपछि हत्या भएको थियो।
सो घटनामा संलग्न रहेको भन्दै प्रहरीले चार जनालाई शुक्रबार गोली हानेर मारिदिएको छ।