गोरखा र मनाङमा १/१ जना विदेशी पर्यटकको मृत्यु भएको छ।
मनाङको ङिस्याङ ६ स्थित मनाङ गाउँमा जापानी नागरिक हिसाको कोरीको मृत्यु भएको हो। होटल हिमालयन सिङ्गीमा पासपोर्ट नं. ००४६२६२ का बसेका ६७ वर्षीय कोरीको मृत्यु भएको प्रहरीले जनाएको छ।
यस्तै, गोरखामा लेक लागेर फ्रान्सेली पर्यटकको भारी बोकेर गएका पोटर २७ वर्षीय टिसबहादुर गुरुङको मृत्यु भएको छ। उत्तरी गोरखाको चुमनुब्री १ साम्दोस्थित होटल याकमा लेक लागेर उनको मृत्यु भएको प्रहरीले जनाएको छ। उनी गोरखा धार्चे ४ का बासिन्दा हुन्।
यसैगरी, पोखरामा प्याराग्लाइडिङ दुर्घटना हुँदा २ जना घाइते भएका छन्। घाइते हुनेमा पोखरा ३२ पुम्दी भुम्दीका २४ वर्षीय प्यारापाइलट सुरज गुरुङ र भारतको मुम्बई घर भएका पर्यटक २९ वर्षीय कुनाल राजेन्द्र शाह रहेका छन्। पोखरा घुम्न आएका शाह उक्त प्याराग्लाइडिङमा सवार थिए।
पोखराको सराङकोटबाट माउण्टेन ओभर भ्यू प्याराग्लाइडिङ कम्पनीको उक्त प्याराग्लाइड ल्याण्ड गर्ने क्रममा प्राविधिक खराबीका कारण अनियन्त्रित भई दुर्घटना भएको प्रहरीले जनाएको छ।
दुवै जना घाइतेलाई पोखरास्थित मेट्रोसिटी अस्पतालमा उपचार गर्न लगिएको छ।
