साइकल लेन मिच्नेलाई जरिवाना र कारबाहीको नियम ल्याउँदै ललितपुर महानगर

सेतोपाटी संवाददाता

काठमाडौं, मंसिर २३

ललितपुरमा साइकल लेन उद्घाटन क्रममा मेयर चिरिबाबु महर्जन। तस्बिर: प्रभाकर गौतम/सेतोपाटी

ललितपुर महानगरपालिकाले साइकल लेन मिच्ने सवारी चालकलाई जरिवाना र कारबाहीको दायरामा ल्याउने भएको छ।

मुख्य सडकसँग जोडिएको लेनलाई दुईपाङ्ग्रे र चारपाङ्ग्रे सवारीले हस्तक्षप नगरून् भनेर यस्तो नियम ल्याउन लागेको ललितपुर मेयर चिरिबाबु महर्जनले बताए। उनका अनुसार पुस मसान्तभित्रै यस्तो नियम ल्याउने महानगरको तयारी छ।

'साइकल लेन मुख्य सडकसँगै जोडिएकाले अन्य सवारीले नियम पालना नगर्न सक्छन्,' मेयर महर्जनले सेतोपाटीसँग भने, 'साइकल यात्रीको सुविधा सुनिश्चित गर्न पनि नियम ल्याउनुपर्ने देखियो।'

उनले यही मंसिर १५ गते सडकमा सेतो धर्को तानेर साइकल लेन उद्घाटन गरेका हुन्। व्यस्त सडकमा लेन छुट्याए पनि वैज्ञानिक भने देखिएको छैन। यसलाई व्यवहारिक बनाउन लेनलाई दुई प्रकारमा छुट्याइने महर्जनले बताए।

'साइकलका लागि मात्र भनी तोकिएको लेनमा अन्य सवारी पस्न पाउँदैनन्,' उनले भने, 'त्यस्तोमा कारबाही हुन्छ। साइकल लेनका केही हिस्सामा भने आवश्यकताअनुसार अन्य सवारीले पनि स्थान पाउने छन्।'

दक्षिण एसियाली खेलकुद (साग) का कारण साइकल लेन विस्तारमा ढिलाइ भए पनि खेल सकिएको भोलिपल्टै सडकको दुवैतिर साइकल लेन छुट्याउने उनले बताए।

प्रकाशित मिति: सोमबार, मंसिर २३, २०७६ ०४:०२

सिफारिस