विद्यार्थीले कुटेपछि थलिएका त्रिचन्द्र बहुमुखी क्याम्पस काठमाडौंका प्रमुख प्राध्यापक डाक्टर प्रदीपबहादुर न्यौपाने एक साता अस्पताल बसेर घर फर्किएका छन्।
क्याम्पसले स्नातक तह पहिलो वर्षमा मानविकी र विज्ञान संकायमा भर्ना शुल्क वृद्धि गरेको विरोधमा विद्यार्थीले न्यौपानेमाथि मंसिर ९ गते आक्रमण गरी घाइते बनाएका थिए।
घटनामा संलग्न रहेको आरोपमा सत्तारूढ नेपाल कम्युनिष्ट पार्टीको भातृ विद्यार्थी संगठन अनेरास्ववियूका गोविन्द थपलिया र मनराज थापा पक्राउ परेका थिए।
घटनाको दुई साता भएको छ। तर क्याम्पस प्रमुख न्यौपाने तंग्रिएका छैनन्। उनी क्याम्पस जान सकेका छैनन्। हात र खुट्टामा लगाइएको ब्यान्डेज खोलिएको छैन।
शुक्रबार घर फर्किएका न्यौपानेले सेतोपाटीसँग आफूमाथि आक्रमण गर्नेलाई प्रशासनले कडा कारबाही नगरेको बताए।
‘मलाई लात्ताले पिठ्यूमा हान्ने विद्यार्थीलाई किन प्रशासनले कडा कारबाही गरेन?,’ उनले भने, ‘घटनाका फुटेज हेर्ने भए हामीसँग छ।’
शुल्क वृद्धि फिर्ता नगरेको आरोपमा न्यौपानेमाथि अनेरास्ववियूका विद्यार्थी जाइलागेका थिए।
‘त्रिभुवन विश्वविद्यालयका अरू आंगिक क्याम्पसमा पनि भर्ना शुल्क वृद्धि भएको छ। त्यहाँ पनि विद्यार्थी संगठन छन् तर विरोध भएको सुनेको छैन,’ उनले सेतोपाटीसँग भने, ‘ममाथि आक्रमण गरे। शुल्क वृद्धि मात्र कारण होइन होला, आक्रमणका अरू पनि कारण हुनुपर्छ।’
उनका अनुसार शुल्क वृद्धिको बहनामा आफूमाथि हटाउने खेल पनि भइराखेको छ।
‘अहिले अनुकूल मौका छ यसलाई हटाउने भन्ने हिसाबले पनि आक्रमण भएको हो कि, थप बुझ्दैछु,’ उनले भने, ‘फलाम तातेको बेला हिट गर्नुपर्छ भन्ने हिसाबले आक्रमण गरेका पनि हुन सक्छन्।’
शुल्क वृद्धिको प्रस्ताव मात्र गरिए पनि मरासन्न हुने गरी कुटपिट गर्नु अमानवीय भएको उनको भनाइ छ।
‘शुल्क वृद्धि भएको होइन। बढाउने प्रस्ताव गरिएको थियो। नबुझेर हल्ला फैलाएका हुन्,’ उनले प्रश्न गरे, ‘क्याम्पस प्रमुखले भर्ना शुल्क वृद्धि गर्न पाउने नियम नै छ। त्रिविले निर्देशन नै दिएको छ त्यही पालना गर्दा ममाथि किन कुटपिट?’
उनका अनुसार हरेक वर्ष १० प्रतिशतका दरले भर्ना शुल्क वृद्धि गर्न पाइने नियम छ।
‘५० हजार रूपैयाँको मोबाइल बोक्नेलाई सालमा एक/दुई हजार शुल्क बढाएकोमा त्यति धेरै आपत्ति हुनु नपर्ने,’ उनले भने, ‘यसमा राजनीति जोडिएको हुनुपर्छ, शुल्क वृद्धि प्रस्ताव हुँदैमा कुटपिट गर्नु पर्ने कारण थिएन।’
विद्यार्थीले आफूमाथि पिठ्यु, हात र खुट्टामा आक्रमण गरेको उनले बताए।
‘दाँया हात अझै राम्रोसँग चलाउन भएको छैन। ब्यान्डेज खोलेको छैन,’ उनले सेतोपाटीसँग भने, ‘क्याम्पस कहिले फर्कने अहिले भन्न सक्दिनँ। अस्वस्थ नै छु, ठीक भए चाँडै फर्किन्छु।’
शुल्क वृद्धि नै नगरिएको कुरालाई एक सय १० प्रतिशतले वृद्धि भयो भन्ने हल्ला चलाएर आफूमाथि आक्रमण भएको उनले बताए।
‘एक जना विद्यार्थीसँग पनि वृद्धि भएको शुल्क लिएको थिएन,’ उनले भने।
उनले शिक्षण अस्पतालमा उपचार गराएका हुन्।
‘अस्पतालले ५० प्रतिशत रकम मात्रै लियो, उपचार खर्च धेरै तिर्नुपरेन,’ न्यौपानेले भने।
क्याम्पस प्रमुख न्यौपानेमाथि आक्रमण गरेको आरोपमा पक्राउ परेका अनेरास्ववियूका दुई जना विद्यार्थीमाथि प्रहरीले अभद्र व्यवहार मुद्दाअनुसार कारबाही गरेको जनाएको छ।
महानगरीय प्रहरी परिसरका प्रहरी नायब उपरीक्षक होविन्द्र बोगटीले अनेरास्ववियूका थपलिया र थापालाई अभद्र व्यवहार अनुसार मुद्दा लगाएर जिल्ला प्रशासन कार्यालय काठमाडौंमा पेश गरेको थियो। उनीहरू दुबै जना अहिले छुटिसकेका छन्।