नेपाल प्रहरीका प्रहरी महानिरीक्षक सर्वेन्द्र खनालले सानातिना असफलताले प्रहरीको मुख्य काम ओझेलमा पर्ने गरेको बताएका छन्।
सोमबार जिल्ला प्रहरी कार्यालय तेह्रथुमको नवनिर्मित कार्यालय भवनको उद्घाटन गर्दै खनालले सानातिना असफलतालाई मूल्यांकन गरेर प्रहरीले कामै गरेन भन्न नहुने बताए।
‘सानातिना असफलताले प्रहरीको मुख्य काम ओझेलमा परेका छन्,’ खनालले भने, ‘संगठनभित्र र जनतालाई सुरक्षा दिने मामलामा प्रहरीमा दर्जनौं काम भएका छन्।’
त्यस्तै, उनले नागरिकको मन जित्ने गरी काम गर्न समेत प्रदेश प्रहरी र मातहतको जिल्ला प्रहरी कार्यालयलाई निर्देशन दिए।
जनतासँग सम्बन्धित काम कारबाहीलाई यथाशक्य सक्न खरो रूपमा उत्रन समेत उनले सबैसँग आग्रह गरे।
संयमित भएर काम गर्न उनले प्रहरीलाई सुझाव दिए।
पहुँच र ओहोदाबाट अपराधी कुनै हालतमा उम्न नसक्ने उनले बताए।
खनालले तेह्रथुममा सडक आयोजना अलपत्र पारेर जनतालाई दुख दिने ठेकेदारलाई पनि कानुनी दायरामा ल्याइने बताए। ग्रामिण भेगमा सडककै कारण सवारी दुर्घटना बढेको भन्दै त्यसको न्युनिकरण लागि सबैको साथ र सहयोग अपरीहार्य भएको उनले बताए।