धादिङ, सप्तरी, नवलपरासी (पूर्व), रुपन्देही, धनुषा र मकवानपुरका विभिन्न स्थानमा भएका दुर्घटनामा १२ जनाको मृत्यु भएको छ।
धादिङ, निलकण्ठ नगरपालिका ८ मैदी भञ्ज्याङस्थित सडकमा ग१ख ८०१२ नम्बरको आइचर ट्रक अनियन्त्रित भई मंगलबार दिउँसो दुर्घटना हुँदा सोही नगरपालिका २ बस्ने ३३ वर्षीय प्रेम गुरुङसहित सात जनाको मृत्यु भएको छ।
दुर्घटना गम्भीर घाइते भएका उनीहरूको जिल्ला अस्पतालमा उपचारको क्रममा मृत्यु भएको हो। दुर्घटनामा घाइते भएका १८ जनाको ट्रमा सेन्टरमा र एक जनाको शिक्षण अस्पताल महाराजगन्जमा उपचार भइरहेको छ। उक्त गाडी मैदी भञ्चाङस्थित ढोला मण्डलीबाट धादिङबेशीतर्फ जाँदै गर्दा दुर्घटना भएको थियो।
मादक पदार्थ सेवन गरेका चालकले लापरबाहीपूर्वक सवारी चलाउँदा दुर्घटना भएको प्रहरीले जनाएको छ। सप्तरी, शम्भुनाथ नगरपालिका १ स्थित सडकमा मंगलबार दिउँसो बा३ख ७९७७ नम्बरको हाएसको ठक्करबाट सोही स्थानका आठ वर्षीय बालक प्रशान्त चौधरीको मृत्यु भएको छ। ठक्करबाट गम्भीर घाइते भएका उनको युनिक अस्पताल रुपनीमा उपचारको क्रममा मृत्यु भएको हो। गाडी र चालकलाई प्रहरीले नियन्त्रणमा लिएको छ।
नवलपरासी (पूर्व), हुप्सेकोट गाउँपालिका ४ स्थित सडकमा ग१झ ३८९ नम्बरको गाडीले सोही स्थान बस्ने ५५ वर्षीय भीमबहादुर लुङ्गेलीसमेत पाँच जनालाई मंगलबार दिउँसो ठक्कर दिँदा ५ वर्षीय दिपु गाहाको मृत्यु भएको छ।
ठक्करबाट गम्भीर घाइते भएका उनको पुरानो मेडिकल कलेज चितवनमा उपचारको क्रममा मृत्यु भएको हो। ठक्करबाट घाइते भएका अन्य चार जनाको सोही अस्पतालमा उपचार भइरहेको छ। चालक गाडी लिएर फरार भएका छन्।
रुपन्देही, तिलोत्तमा नगरपालिका ५ नयाँमिलस्थित सडकमा मंगलबार साँझ लु२४प १६७१ नम्बरको मोटरसाइकलबाट लडेर गम्भीर घाइते भएका भारत महाराजगन्ज राममन्दिरका ७० वर्षीय राम सुलभ कुर्मीको ५ नम्बर प्रादेशिक अस्पताल बुटवलमा उपचारको क्रममा मृत्यु भएको छ।
धनुषा, औरही गाउँपालिका(२ देउरी चोकस्थित सडकमा अन टेस्ट लेखिएको ट्याक्टर अनियन्त्रित भई मंगलबार राति दुर्घटना हुँदा सोही ट्याक्टरले किचेर चालक सोही गाउँपालिका-१ पुरनदेहीयाका ३५ वर्षीय सखिचन पासवानको घटनास्थलमै मृत्यु भएको छ।
मकवानपुर, हेटौंडा उपमहानगरपालिका-११ नवलपुरस्थित सडकमा ना५च १७७७ नम्बरको जिपले ना४३प ४९१४ नम्बरको मोटरसाइकललाई बुधबार बिहान ठक्कर दिँदा मोटरसाइकल चालक सोही उपमहानगरपालिका १९ का २१ वर्षीय सुनिल स्याङतानको मृत्यु भएको छ।
ठक्करबाट गम्भीर घाइते भएका उनको चुरेहिल अस्पताल हुँदै हेटौंडा अस्पतालमा थप उपचारको क्रममा मृत्यु भएको हो। दुर्घटनामा घाइते भएका मोटरसाइकलमा सवार मनहरी ज्यामिरे बस्ने १८ वर्षीय साजन भोलनको चुरेहिल अस्पतालमै उपचार भइरहेको छ। जिप र चालकलाई प्रहरीले नियन्त्रणमा लिएको छ। छ ।
