नारायणघाट-मुग्लिन सडकमा बुधबार पनि सवारी जाम छ।
मंगलबार राति तुइन खोला पुल नजिकै खसेको सुख्खा पहिरो पन्छाइसके पनि सडकमा सवारी जाम कम भएको छैन।
सुख्खा पहिरो राति ३ बजे सफा गरिसकिएको थियो। पहिरो सफा गरेर यातायात सुचारू गरे पनि अहिलेसम्म सहज हुन नसकेको नारायणघाट-मुग्लिन सडक आयोजनाले जनाएको छ।
जथाभावी सवारीसाधन ओभरटेक गर्दा जाम कम गर्न नसकिएको आयोजनाको भनाइ छ।
सडकमा अहिले पनि तीन लाइनमा सवारी साधन छ।
‘जाम परेको बेला दुवैतिरबाट लामबद्ध सवारी गुडाउन छाडेर दुइटा गाडी उछिन्न अघि बढ्दा दुई घण्टा थप जाम भइरहेको हुन्छ,’ आयोजनाले भनेको छ।
सबै ठाउँमा ट्राफिक प्रहरीले जाम खुलाउन नसक्ने उल्लेख गर्दै आयोजनाले चालकलाई अनुशासित र सभ्य भएर सवारीसाधन गुडाउन आग्रह गरेको छ।
